Швейцар улсад хуулийн дагуу амиа хорлох зориулалттай техникийг ашиглаж эхлэхэд бэлэн болжээ

Швейцар улсад удахгүй зөөврийн амиа хорлох машиныг анх удаа ашиглах гэж байгааг хүмүүсийн хуулийн дагуу амьдралаас татгалзах эрхийг дэмждэг “The Last Resort” хөдөлгөөнийхөн өчигдөр мэдээлжээ.

2019 онд анх танилцуулагдаж байсан Sarco хэмээх энэ техник нь доторх агаарын хүчилтөрөгчийг азотын хийгээр солих замаар хүнийг үхэлд хүргэх зориулалттай юм.

Швейцар улсын хувьд ийм төхөөрөмжийг хэрэглэж эхлэхэд хууль зүйн ямар нэг саадгүй болсныг “The Last Resort” байгууллага мэдээлжээ.

“Sarco төхөөрөмжийг ашиглах хүсэлтэй хүмүүсийн захиалга нэмэгдэж буй тул ойрын үед анх удаа хэрэгжүүлэх төлөвтэй байна” гэж тус байгууллагын гүйцэтгэх захирал Флориан Уиллет хэвлэлийн хурлын үеэр хэлсэн юм.

“Хүчилтөрөгчгүй агаараар амьсгалах замаар мөнх нойрсохоос илүү сайхан үхлийг би төсөөлөхгүй байна” гэж тэр нэмж хэлжээ.

Одоо ийм замыг сонгосон хүмүүс сэтгэцийн эрүүл мэндийн сорил өгөх нь хуулийн гол шаардлага болж байгаа юм байна.

Sarco төхөөрөмжид орсон хүн автомат дуу хоолойгоор тавьсан компьютерын хэдэн асуултад хариулсны дараа зааврын дагуу товч дарах ажээ.

Ингэхэд бүхээгийн дотоод агаар дахь хүчилтөрөгчийн хэмжээ 30 хүрэхгүй секундийн дотор 21 хувиас 0.05 хувь болж буурах гэнэ.

“Үүний дараа хүн таван минут орчмын турш ухаангүй байсны эцэст нас бардаг” гэж Sarco төхөөрөмжийг зохион бүтээгч Филип Ницке тайлбарлажээ.

Яг одоогоор Sarco төхөөрөмжийг хэн хамгийн түрүүнд ашиглах, хэзээ, хаана ашиглахыг тогтоогоогүй байгаа гэнэ.

Ийм мэдээллийг тухайн хүн нас барсны дараа зарлаж байхаар төлөвлөжээ.

“Бид тухайн хүний тайван нойрсох хүслийг Швейцарын хэвлэл мэдээллийн хэрэгслүүдийн зугаа болгох хүсэлгүй байна” гэж “The Last Resort” байгууллагын зөвлөх хорооны гишүүн, хуульч Фиона Стюарт мэдэгдсэн байна.

Ямартай ч энэ онд багтаан анх удаа хэрэгжүүлэхээр болсныг тэр баталжээ.

Sarco төхөөрөмжийг ашиглах хүнээс азотын хийн төлбөр 18 франкаас ($20) өөр зардал гарахгүй юм байна.

Эх сурвалж: AFP