Сөнөөгч онгоц нийлүүлэх гэрээ байгуулагдсаны дараа Унгарын парламент Швед улс НАТО-д элсэхийг дэмжихээр боллоо

Швед улсыг НАТО-гийн гишүүнээр элсэхэд тулгараад байсан сүүлчийн саад нь Унгар улс байсан юм. Умард Атлантын цэргийн эвсэлд шинэ гишүүн орон элсэхийн тулд бусад бүх гишүүн орнууд тус тусдаа дэмжсэн тогтоол гаргах шаардлагатай байдаг.

Шведийн гишүүнчлэлийг дэмжээгүй НАТО-гийн ганцхан гишүүн үлдээд байсан нь Унгар юм.

Тэгвэл Унгарын парламент ирэх долоо хоногт уг асуудлыг эцэслэн шийдвэрлэхээр болсныг тус улсын ерөнхий сайд Виктор Орбан өчигдөр Будапешт хотод Шведийн ерөнхий сайд Улф Кристерссонтой уулзсаныхаа дараа мэдэгджээ.

Энэ уулзалтын үеэр Швед улс өөрийн үйлдвэрийн Gripen сөнөөгч онгоцыг Унгарт нийлүүлэх гэрээ байгуулсан байна.

Ингэснээр Унгарын агаарын зэвсэгт хүчний нөөцөд байдаг Gripen сөнөөгч онгоцны тоо 14-өөс 18 болж нэмэгдэхээр болжээ. Одоо ашиглагдаж буй 14 онгоцны түрээсийн хугацаа 2026 онд дууссаны дараа эзэмшлийг Унгарт шилжүүлэхээр болсон байна. Онгоцыг үйлдвэрлэгч Saab AB компани 2036 он хүртэл Унгарын талд техникийн дэмжлэг тусламж үзүүлэхээр тохиролцжээ.

Умард Европын төвийг сахих уламжлалт гадаад бодлоготой Швед, Финланд улсууд Украины дайн эхэлсний дараа НАТО-д элсэх шийдвэрээ гаргасан юм.

Финланд улс өнгөрсөн оны дөрөвдүгээр сард НАТО-гийн гишүүн болсон. Харин Шведийн хувьд Турк, Унгар улсууд дэмжилгүй саад учруулж байлаа.

Турк улсын парламент өнгөрсөн сард эцсийн шийдвэрээ гаргасан. АНУ-ын засах захиргаа F-16 сөнөөгч онгоц Турк улсад нийлүүлэх тохиролцоонд хүрсний дараа уг шийдвэр гарсан юм.

Унгарын ерөнхий сайд Виктор Орбан нь Европын Холбооны гишүүн орнуудын удирдагчдаас Оросын ерөнхийлөгч Путинтэй хамгийн ойр харилцаатай хүнд тооцогддог.

Тэрбээр Европын Холбооноос Украиныг дэмжих асуудлыг үргэлж эсэргүүцдэг. Өчигдөр Орбан хэвлэлд ярихдаа энэ оны арваннэгдүгээр сард АНУ-д болох ерөнхийлөгчийн сонгуульд Дональд Трамп ялбал Украины талаар НАТО-гийн байр суурь өөрчлөгдөнө гэж үзэж байгаагаа илэрхийлжээ.

Эх сурвалж: Reuters