Умард Солонгосын удирдагчийн ОХУ-д хийсэн урт айлчлал өндөрлөв

ОХУ-д долоо хоног айлчилсан Умард Солонгосын удирдагч Ким Жон Уны айлчлал өчигдөр өндөрлөж, хуягт галт тэрэг нь Алс Дорнодын Артём өртөөнөөс хоёр улсын хилийг зорьсон байна.

Лхагва гарагт ОХУ-ын ерөнхийлөгч Владимир Путинтэй сансрын буудалд уулзсан Ким дараа нь зэр зэвсгийн үйлдвэрүүд, орчин үеийн байлдааны техникүүдтэй танилцсан юм.

Бямба гарагт ОХУ-ын батлан хамгаалахын сайд Сергей Шойгу түүнд Владивосток хотод дуунаас хурдан пуужин, стратегийн бөмбөгдөгч нисэх онгоц зэрэг орчин үеийн зэвсэг техникүүдийг үзүүлжээ.

Ням гарагт Оросын албаныхнаас олон тооны бэлэг хүлээж авсныхаа дараа Ким нутгийн зүг жолоо залсан байна.

Приморскийн хязгаарын захирагч Олег Кожемяко түүнд сумнаас хамгаалах иж бүрдэл хувцас, дулааны камерт илрэхээс хамгаалдаг  тусгай хувцас зэргийг бэлэглэсэн тухай ТАСС агентлаг мэдээлжээ.

Бас таван ширхэг камиказе дрон, эгц дээш хөөрдөг тагнуулын зориулалттай “Геран-25” дрон нэг ширхгийг Умард Солонгосын удирдагчид бэлэглэснийг мэдээлсэн байна. Эдгээр нь Приморскийн хязгаарт байдаг үйлдвэрүүдийн бүтээгдэхүүн ажээ.

Үүнээс гадна ОХУ-ын батлан хамгаалахын сайд Сергей Шойгу хүндэт зочиндоо “ушанка” загварын үстэй малгайг гоёлын илдний хамт бэлэглэсэн тухай эх сурвалжууд мэдээлсэн юм.

Ким өчигдөр буцахаасаа өмнө Владивосток хотод суралцаж буй Умард Солонгосын оюутнуудтай уулзсан байна.

Айлчлалын үеэр хоёр улс Украины дайнд ашиглах зэр зэвсэг наймаалцах гэрээ байгуулж болзошгүйг Өрнөдийн орнууд анхааруулж байв.

Кремлийн хэвлэлийн алба айлчлалын үеэр ямар ч гэрээ байгуулаагүйг мэдэгдээд байгаа.

Ким Жон Уны айлчлал “халуун дулаан уур амьсгалд болж”, “хоёр орны нөхөрлөл, эв нэгдэл, хамтын ажиллагааны шинэ эринийг эхлүүлсэн” тухай Умард Солонгосын төв хэвлэл Ням гарагийн мэдээндээ онцолжээ.

Эх сурвалж: Reuters