Залуусыг нүцгэн зургаар нь дарамтлан мөнгө нэхдэг Нигерийн иргэдийг АНУ-ын хуулийн байгууллагад шилжүүлэн өгчээ

Залуус, өсвөр насныхныг нүцгэн, ил задгай авхуулсан гэрэл зургаар нь дарамталж, сүрдүүлдэг олон улсын онлайн сүлжээ ажиллуулж байсан Нигерийн хоёр иргэнийг тус улсын эрх баригчид АНУ-д шилжүүлж өгсөн тухай хуулийн албаны эх сурвалж Ням гарагт мэдээлжээ.

Нигерийн Лагос хотын оршин суугчид болох 22 настай Самуэл Огоши, 20 настай Самсон Огоши нарын шүүх хурал Даваа гарагт Мичиган мужийн Гранд Рапидс хотод болох гэж буйг АНУ-ын шүүгч Марк Тоттен мэдээлсэн байна.

Тэд эмэгтэй хүний дүрээр онлайн орчинд залуус, өсвөр насны хөвгүүдтэй харилцаж, ил задгай авхуулсан гэрэл зургийг нь олж авсны дараа мөнгө нэхэж, биелүүлэхгүй бол зургийг нь нийтэд тараахаар сүрдүүлдэг байжээ. Ийм төрлийн гэмт хэргийг олон улсад “sextortion” гэж нэрлэдэг юм.

Үүний улмаас Мичиган мужийн 17 настай Жордан Демэй хэмээх залуу 2022 оны гуравдугаар сарын 25-нд амиа хорлосон байна. Энэхүү эмгэнэлт хэргийг мөрдөн шалгасан АНУ-ын хуулийн байгууллагууд Нигерийн гэмт хэрэгтнүүдийн сүлжээг илрүүлж, ял шийтгэл оноохоор болжээ.

“Энэ бол аймшигтай гэмт хэрэг. Ийм гэмт хэрэг үйлдсэн хүмүүст хэлэхэд: Бид та нарыг дэлхийн хаанаас ч олох болно. Хохирогчдод хандан хэлэхэд: Бид танд туслахад бэлэн байна” гэж шүүгч Тоттен мэдэгдсэн байна.

Эх сурвалж: Associated Press