Энэтхэгт галт тэрэгнүүд мөргөлдөх үеэр 120 хүн амь үрэгдэж, 850 орчим хүн бэртэв
Энэтхэг улсын зүүн бүсийн Одиша мужид өнгөрсөн шөнө галт тэрэгнүүд мөргөлдсөн томоохон осол гарсан байна.
Энэ ослын үеэр 120 гаруй хүн амиа алдаж, 850 орчим хүн бэртсэн тухай албаны эх сурвалж мэдээлжээ.
Осол гарсан Баласор дүүргийн нутаг руу 200 гаруй түргэн тусламжийн автомашин илгээснээ Одиша мужийн захирагч Прадеп Жена мэдээлсэн байна.
Зорчигч тээврийн галт тэрэгний нэг цуваа замаасаа гарч, зэрэгцээ зам дээр байсан өөр нэг цувааг мөргөснөөс осол гарчээ.
Coromandel Express болон Howrah Superfast Express чиглэлийн галт тэрэгнүүд хоорондоо мөргөлдсөн болохыг Энэтхэгийн Төмөр Зам компани баталсан байна.
Осолдсон цуваанд дарагдсан зорчигчдыг аврах ажил үргэлжилж байгаа ажээ. Одоогоор цуваанаас 120 хүний цогцос гаргаад байгаа ба амиа алдсан хүний тоо цаашид нэмэгдэх өндөр магадлалтай байна. Энэтхэгийн ерөнхий сайд Нарендра Моди хохирогчдын ар гэрийнхэнд эмгэнэл илэрхийлжээ.
Энэтхэг бол дэлхийн хамгийн том төмөр замын сүлжээтэй улсуудын нэг. Тус улсын эрх баригчид төмөр замын дэд бүтцээ шинэчлэхэд жил бүр их хэмжээний хөрөнгө мөнгө зарцуулдаг ч осол байнга гарсаар байдаг юм.
Эх сурвалж: BBC
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
10 СЭТГЭГДЭЛТЭЙ
|
