Олон нийтийн сүлжээнд хүний эрхийг хамгаалах хуульд тавьсан Ерөнхийлөгчийн хоригийг УИХ хүлээж авах нь зүйтэй гэж үзлээ

ШУУД ҮЗЭХ: 

Хэлэлцэж буй асуудалтай холбогдуулан гишүүд үг хэлэв. 

УИХ-ын гишүүн Ц.Сандаг-Очир "Олон нийтийн сүлжээнд хүний эрхийг хамгаалах тухай хуулийн агуулгыг буруу мушгиж тайлбарлаад гуйвуулаад байх юм. Үндсэн хуулиар олгогдсон үг хэлэх, нэгдэж жагсаж цуглах эрхийг хааж боосон зүйл уг хуульд нэг ч байхгүй. 

Цахим орчинд эрх нь зөрчигдөж байгаа иргэдийн эрхийг хамгаалах тухай хууль юм. Гэтэл жагсаж цуглаж, үгээ хэлэх гэж байгаа иргэдийн эрхэд халдаж байгаа юм шиг зүйл ярьж, ингэж ойлгуулж байгаад харамсаж байна. Хуультай сайн танилцаарай. 

Харин тухайн хуулийг заавал ийм яаруу сандруу намрын чуулганы төгсгөлд хэлэлцэж батлах хэрэгцээ шаардлага юу байсан бэ? Ингэснээр Ерөнхийлөгчийн хориг тавих нөхцөлийг бүрдүүлсэн гэж харж байна. Нийгэмд тус хуулийн хэрэгцээ шаардлага байна. Олон нийтийн сүлжээнд хүний эрхийг хамгаалах тухай хуулийг олон нийтээр хэлэлцүүлж, дахиж оруулж ирэх хэрэгтэй. Зөрчил гаргасан бол түүнийгээ засъя.

Миний хувьд ийм хууль батлагдах нь цаг хугацааны асуудал гэж ойлгож байгаа. Цахим гэмт хэргийн хохирол, хохирогч нарын тоо нэмэгдэж байгаа" хэмээв. 

Олон нийтийн сүлжээнд хүний эрхийг хамгаалах тухай хуульд тавьсан Ерөнхийлөгчийн хоригийг УИХ хүлээж авах нь зүйтэй гэж үзлээ. Иргэний нийгмийн байгууллагуудын саналыг авч, уг хуулийг дахин өргөн мэдүүлэх нь зүйтэй гэдгийг гишүүдийн олонх хэлж байв. 

УИХ-ын дарга Г.Занданшатар "Хууль зүйн байнгын хороо болон Аюулгүй байдал, гадаад бодлогын байнгын хороо Хүний эрхийн үндэсний комисстой хамтран хэлэлцүүлэг зохион байгуулж, Олон нийтийн сүлжээнд хүний эрхийг хамгаалах тухай хуулийн төслийг шинэчлэн боловсруулах, санал авах, Хууль тогтоомжийн тухай хуульд заасан шаардлагад нийцүүлэн дахин өргөн мэдүүлэх чиглэл өгч байна" хэмээв.