Рамзан Кадыров эрүүл мэндтэй нь холбоотой цуурхлыг няцаажээ

ОХУ-ын Чеченийн Бүгд Найрамдах Улсын тэргүүн Рамзан Кадыров хүндээр өвдсөн тухай сүүлийн үед нэлээд яригдах болсон.

Тэгвэл тэр өчигдөр Телеграм хуудсандаа энэ цуурхлыг няцаасан мэдэгдэл гаргажээ. “Би эрүүл саруул бөгөөд эрч хүчээр дүүрэн байна. Би ердийн үе шигээ спортоор хичээллэж, ууланд алхаж, улс орныхоо хөгжил цэцэглэлтэй холбоотой чухал асуудлуудыг шийдэж байгаа” гэж хэлсэн Кадыров өөрийг нь удахгүй болсон гэдэгт найдаж байсан хүмүүсийн урмыг хугалах болсондоо уучлал гуйсан байна.

Одоо 46 настай Кадыров 2007 оноос хойш Чеченийг хатуу гараар удирдаж байгаа. Германы Bild сонинд энэ сарын эхээр түүнийг бөөрний өвчнөө эмчлүүлэхээр Арабын Нэгдсэн Эмират Улсаас нарийн мэргэжлийн эмч дуудсан тухай мэдээлсэн юм. Бас Кадыровыг хэн нэгэн хордуулсан байж болзошгүй тухай яриа хүртэл тарж байв.

Кадыров сүүлийн үед гарын хуруундаа эмчилгээний зориулалттай байж болзошгүй төхөөрөмж зүүдэг болсон.

Харин өчигдөр тэр үүнийгээ өдөр тутмын шашны зан үйлийг нь бүртгэх зориулалттай төхөөрөмж гэж тайлбарлажээ.

Хоёрдугаар сарын 21-ний өдөр Кремлийн ордонд ОХУ-ын ерөнхийлөгч Путиний тавьсан илтгэлд Кадыров оролцоогүй нь сэжгийг улам нэмэгдүүлж байв.

Саяхан Кадыровын 17 настай хүү Ахмат албан бус шугамаар Кремльд Путинтэй уулзсан нь бас нэг ярианы сэдэв болж байлаа. Тухайлбал Чеченийг удирдах дараагийн хүний асуудал яригдаж эхэлсэн гэх цуурхал тарсан юм.

Даваа гарагт Кремлийн ордонд Путин, Кадыров нар уулзсан тухай мэдээ цацагдаад байгаа. Чеченийн эдийн засаг, Өрнөдийн хоригийн нөлөө зэргийг хэлэлцсэн гэгдэж байгаа энэ уулзалтын дүрс бичлэг бас л этгээд сонин харагдаж байлаа.

Путиний үнэнч хүмүүсийн нэг гэгддэг Кадыров нэг жил гаруйн өмнө эхэлсэн Украины дайныг идэвхтэй дэмжигчдийн нэг юм. Тэр бүр нэг удаа өсвөр насны хоёр хүүгээ фронтын шугам руу илгээснээ зарлаж байв.

Эх сурвалж: The Moscow Times