И.Мөнхжаргал: Хоёр их наяд 374 тэрбум төгрөгийн авлигын хохирлыг нөхөн төлүүлсэн АТГ-т баярлалаа
С.Зориг агсны хөшөөний дэргэдэх Ардчилсан Нам(АН)-ын байранд тус намын төлөөлөл Монголчуудын боломжийг хулгайлсан авлигач, нүүрсний хулгайчдын улсад учруулсан хохирлын талаар өнөөдөр мэдээлэл өглөө.
Энэ үеэр тус намын Ерөнхий нарийн бичгийн дарга И.Мөнхжаргал "Авлигатай Тэмцэх Газар(АТГ)-аас өгсөн мэдээллээс үзэхэд 2022 онд Монгол Улсын жилийн төсвийн дөрөвний нэгтэй тэнцэх хэмжээний хохирлыг улсад учруулжээ.
Тодруулбал, 2022 оны манай улсын төсөв 18.7 их наяд төгрөг байсан бол авлигын гэмт хэргээс болж улсад учруулсан хохирлын хэмжээ таван их наяд төгрөгт хүрчээ.
Харин нүүрсний гэх хулгайгаас болж улсад 44 их наяд төгрөгийн хохирол учирсан нь улсын төсвөөс хоёр дахин их байгаа юм. Үүнийг иргэд эсэргүүцэж тэмцэж байгаа ч тэдний амыг хаах хууль батлахын зэрэгцээ худлаа ярьж байна.
Авлигаас олсон мөнгөөрөө орон сууц, газар худалдан авдаг хэргүүд тогтоогдоод байгаа. Өнөөдрийн байдлаар нүүрсний гэх 36 хэрэгт мөрдөн шалгах ажиллагаа явуулж байгаа бөгөөд 127 объектод нэгжлэг хийжээ. 246 хүнийг гэрчээр дуудаж, 421 хүнээс мэдээлэл авч, 640 баримт бичгийг байгууллагаас гаргаж ажилласан тухайгаа АТГ-аас мэдээлэв.
Хэдийгээр АТГ-т маш их хохирол учруулсан гэх тоон утгууд гарч ирдэг ч шүүхээр эцэслэгдэн шийдэгдэж байгаа албан тушаалтны хэрэг байхгүй. Тиймээс АТГ-ыг улс төрийн намууд, иргэд, төрийн бус байгууллагуудын хяналт дор ажиллуулах шаардлагатай.
Хэрвээ 44 их наяд төгрөгийн хохирлыг улсад эргэн төлүүлж, Монгол Улсын иргэн бүрд хуваарилах юм бол нэг хүнд 13 сая төгрөг ногдох юм.
Авлигын гэмт хэргийн улмаас учирсан таван их наяд төгрөгийн хохирлоос мөрдөн байцаалтын явцад хоёр их наяд 374 тэрбум төгрөгийг нөхөн төлүүлсэн АТГ-т баярлалаа.
Авлигатай тэмцэх үйл хэрэгт нийт иргэнийг идэвхтэй оролцохыг уриалах гэсэн юм. Энэ их хулгайг нуухын тулд бусад зүйл рүү иргэдийн анхаарлыг хандуулж байна.
Мөн нийтэд худал мэдээлэл тараасан ХЗДХ-ийн сайд Х.Нямбаатар уучлал гуйж, Ерөнхийлөгчийг хориг тавихыг хүсэж байна" хэмээв.
Үргэлжлүүлэн тэрбээр "Миний бие АТГ-ын олон нийтийн зөвлөлд чамгүй хугацаанд ажилласан. Олон улсын жишгээс харахад авлига, албан тушаалын хэрэгтэй холбогдсон улс төрд нөлөө бүхий этгээдүүдийг нийгмийн анхаарлын төвд оруулж, олны хяналтад шүүлгэдэг. Ингэснээр тухайн хэрэг үнэн зөв шийдэгдэж, улс төрийн нөлөөллөөс ангид байлгах гаргалгаа болдог" гэлээ.
Авлигын хэргийн хохирол 2021 онд нэг их наяд төгрөг, 2022 онд таван их наяд төгрөг гэх мэтчилэн жилээс жилд өсөж байна. Гадаа нь нь очоод жагсах, албан бичгээр шаардлага хүргүүлээд шийдэгдэхгүй. Тиймээс эдгээр хэргийг олон нийтийн хяналт дор, нийтэд мэдээллээ өгч шийдвэрлэх хэрэгтэйг нэмж хэлэв.
Түүнчлэн "АН-ын удирдлагын түвшний энэ асуудал нийгэмд байтугай нийт гишүүнд ойлгомжгүй байдал бий болгож байгаа. Өнөөдөр хулгай их гарч, төсвийн мөнгөөр гараа угааж байгаа байдал АН-ын арчаагүйтэй холбоотой. Зарим гэмт хэрэгт АН-ын гишүүд холбогдсон байхыг үгүйсгэхгүй. Тэр хэргээрээ барьцаалагдаад АН-ыг сөрөг хүчин байлгахгүй, эрх баригчдын гар хөлөөр намыг хагалан бутаргадаг.
Өнөөдөр болж байгаа дур зоргоороо үйл явдалд хэлэх үг алга. Тайлбарлаж ч чадахгүй. Гэхдээ манай нам хэзээ нэгэн цагт эвлэлдэж нэгдээд сөрөг хүчнийхээ байр суурьт очихгүй бол эрх баригчид даварсаар байх болно. Миний хувьд намын эв нэгдлийн төлөө байгаа" гэдгийг И.Мөнхжаргал онцолж байлаа.
