Швед улсад чонын сүргийн тоо толгойг цөөрүүлэх ан ав эхэлжээ

Орчин үеийн Шведийн түүхэнд хамгийн томд тооцогдох чонын ав өчигдөр эхэлжээ.

Тус улсын зэрлэг байгальд одоо 460 чоно амьдардаг бөгөөд эрх баригчид үүнийг хэтэрхий олон гэж үзээд 75-ыг нь авлах зөвшөөрөл олгосон байна.

Даваа гарагт эхэлсэн ав нэг сар үргэлжлэх ба 200 анчин оролцож байгаа гэнэ.

“Чонын өсөлтийг сааруулахад ийм ав чухал хэрэгцээтэй. Чонын тоо толгой сүүлийн үед урьд өмнө байгаагүй хэмжээнд хүрээд байна” гэж Шведийн Анчдын Холбооны менежэр Гуннар Глорсен ярьжээ.

Гэхдээ засгийн газрын шийдвэрийг шүүмжлэгчид Шведийн чонын тоо толгойг тийм ч өндөр биш гэж үзэж байна. Тухайлбал Итали улс 3,000 гаруй чонотой юм.

Байгаль хамгаалагчид Бернийн конвенцыг зөрчсөн үндэслэлээр засгийн газраа шүүхэд өгчээ.

“Хоол хүнсний сүлжээний гол махчин болох чоно бол биологийн олон төрөл зүйл хөгжих суурь нөхцөл үүсгэдэг амьтан. Сүргийн тоо толгойн дөрөвний нэгийг устгах нь амьд ертөнц, байгаль орчинд сөрөг нөлөөтэй. Энэ бол бүхэл экосистемийн хувьд гамшиг юм. Чоно оршин тогтнох нь амьтан, ургамлын төрөл зүйлүүдийг илүү баялаг болгоход чухал хувь нэмэртэй. Хүний оршин тогтнол ч эрүүл экосистемээс шалтгаална” гэж ангийн эсрэг тэмцдэг Якткритикерна байгууллагын ерөнхийлөгч Мари Стегард ярьж байна.

Шведийн засгийн газрын байгаль орчныг хамгаалах агентлаг чонын тоо толгойг 300-аас доош бууруулбал нөхөн үржих боломжгүй болгоно гэж үздэг гэнэ.

Тиймээс 300-аас дээш байлгах журам гаргасан байна. Гэтэл Шведийн парламент чонын тоо толгойг 170-270-ын хооронд байлгахад тохиромжтой гэсэн шийдвэрийг олонхын саналаар баталжээ.

Үүнийгээ Европын Холбооны амьтны төрөл зүйлийг устахаас хамгаалах стандартад нийцсэн тоо гэж тайлбарлаж байгаа юм байна.

Парламентын тогтоосон тоог байгаль хамгаалагчид шүүмжилж байгаа. Дэлхийн Байгаль Хамгаалах Сангийн (WWF) араатан амьтны мэргэжилтэн Бэнни Гафверт 170-ыг шинжлэх ухааны үндэслэлгүй тоо гэж дүгнэжээ.

“Зэрлэг амьтдад урьдчилан таамаглаагүй зүйл тохиолдож болно. Тиймээс 170 бол хэтэрхий бага тоо. Бид чонын генетикийн хувьд эмзэг нөхцөл байдалд байгаа, тоо толгой нь багасах тусам эрсдэл нэмэгдэнэ” гэж тэр ярьсан байна.

Шведийн анчид авын эхний өдөр ганц ч чоно агнаж чадалгүй ганзага хоосон буцсан тухай эх сурвалж мэдээлжээ.

Эх сурвалж: The Guardian