Гэрэл зургийг MPA агентлагийн онцгой зөвшөөрөлтэйгөөр ашиглав

Монгол дахь Америкийн Худалдааны танхим Улаанбаатар хотын авто замын түгжрэлийг бууруулах үндэсний хороо, Нийслэлийн ЗДТГ, Монголын авто дистрибьютерийн ассоциаци хамтран “Түгжрэлийн эсрэг нийтээрээ” хэлэлцүүлгийг өнөөдөр зохион байгуулав.

Анх нийслэл хотыг 600 мянган хүнтэй байхаар төлөвлөсөн ч өдгөө хүн амын тоо гурав дахин нэмэгдсээр төвлөрөл, түгжрэл тулгамдсан асуудал болоод байгаа тул түгжрэлийг бууруулах гарц, шийдэл, үүнд олон нийт хэрхэн хувь нэмрээ оруулах тухай ийнхүү хэлэлцүүлэг зохион байгуулсан тухай Нийслэлийн Засаг дарга Д.Сумъяабазар онцолсон юм.

"Нийслэлийн хөрөнгийн хязгаартай байдлыг шийдэхийн тулд нэгжийн зохион байгуулалтыг өөрчлөх хэрэгтэй"

 

Гэрэл зургийг MPA агентлагийн онцгой зөвшөөрөлтэйгөөр ашиглав

Мөн тэрбээр “Хүний нүдэнд харагдахгүй, хуучирч муудсан Улаанбаатар хотын газар доорх байгууламж асуудал.

Бид үүнийг харахгүйгээр зөвхөн дээр нь байгаа өнгөц асуудлын талаар ярьцгаадаг. Гэвч үнэндээ хотын амьдралын 60 хувь нь газар доор явж байна. Түүнийг орчин үеийн байдлаар цэгцэлж, хонгилын шийдэлтэй хот бий болгохоор зориход 420 тэрбум хангалтгүй.

Тиймээс 1.6 сая хүнтэй Улаанбаатар хот өөрөө онцгой статустай хот болох ёстой. Дэлхийн томоохон хотууд дандаа бие даасан байдлаар явдаг. Гэтэл нийслэл өнөөдөр олон улсын хамтарсан байгууллагын санхүүжилтээр юм хийж чадахгүй, дандаа л Сангийн яамыг харж байна. Улаанбаатар хот өөрийгөө тэтгэх санхүүгийн эх үүсвэрээ шийдэж байж дараагийн асуудлууд яригдана.

Энэ бүгдийг улсын төсвөөр шийднэ гэдэг бүтэхгүй. Өөрөөр хэлбэл, хөрөнгийн хязгаартай байдал л хотын хөгжлийн асуудлыг хойш нь татаж байна. Улаанбаатар хотын эрх зүйн байдлын тухай хуулиар нийслэл бие дааж гаднаас хөрөнгө оруулалт татах боломжтой гэсэн мөртлөө Төсөв дагасан хуулиудаар хориглочихсон. Энэ байдлыг халахын тулд Үндсэн хуулийн 57-д заасан нэгжийн зохион байгуулалтыг өөрчлөх хэрэгтэй” гэв.

"Нэг худалдааны төвийг хотын зах руу албадан нүүлгэснээр асуудал шийдэгдэхгүй"

 

Гэрэл зургийг MPA агентлагийн онцгой зөвшөөрөлтэйгөөр ашиглав

Монгол Улсын сайд, Түгжрэлийг бууруулах үндэсний хорооны дарга Ж.Сүхбаатар “Өнөөдрийн байдлаар манай улс жолооч зонхилсон хот болчхоод байна. Жолоочоос зорчигчид зонхилсон хот болгохын тулд явган хүнийг дээдэлсэн, унадаг дугуйг сонгодог, нийтийн тээврийн үйлчилгээг шүтдэг болох ёстой.

Түүнчлэн түгжрэл бол хүний амьдралын олон талт асуудлыг хөнддөг гэдгийг ойлгох ёстой. Манайхан нэг худалдааны төвийг хотоос нүүлгэчихье гэцгээдэг. Гэтэл тэр худалдааны төвийн 5-10 мянган түрээслэгчийн цаана гэр бүл, үр хүүхдийнх нь ажил амьдралынх нь хэв маяг байгаа учраас энэ нь өөрөө ганцхан ажлын байр нүүлгэх тухай асуудал биш болно. Өөрөөр хэлбэл, нэг худалдааны төвийг хотын зах руу албадан нүүлгэснээр асуудал шийдэгдэхгүй. Бид захиргааны хүчилсэн, хязгаарласан, эрх хассан зэрэг албадлагын арга хэрэглэж болохгүй" гэв.

Түүнчлэн Засгийн газраас замын хөдөлгөөний ухаалаг системийг бий болгох ажлыг эрчимжүүлж, ирэх оны эхэн үе гэхэд нэвтрүүлэхээр төлөвлөж байгаа гэдгийг онцолсон юм.

"Зайсан, Туулын гүүрний чиглэлийн уулзваруудад зохицуулалт хийнэ"

Мөн "Хамтын оролцоог бий болгох үүднээс Epolice аппликэйшн идэвхжүүлээд иргэн, хуулийн этгээд камерын хяналтаар бусад зөрчлийг илрүүлэх чиглэлээр ажиллавал урамшуулдаг журмыг нь яаралтай гаргаж өгье гэж бид ярьж байна. Түүгээр зогсохгүй уулзваруудын нэвтрэх хүчин чадлыг сайжруулах асуудал дээр Олимпын гүүрний уулзварт зохицуулалт хийсэн. Удахгүй Зайсан, Туулын гүүрний чиглэлд уулзварын зохицуулалт хийнэ" гэсэн юм.

Дээрээс нь хот төлөвлөлтийн асуудалд Улаанбаатар хотын хөгжлийн төлөвлөгөөг ойрын өдрүүдэд УИХ-д танилцуулах шаардлага байгааг хэллээ. Нийслэл ойрын ирээдүйд хоёр сая хүнтэй болж, автомашины тоо хэчнээн зохицуулалт хийсэн ч улам нэмэгдэнэ. Тиймээс хот төлөвлөлтөөр Улаанбаатар хот ямар үйлчилгээ, яаж байршиж хөгжих дүр зураг гарч ирнэ гэдгийг онцолж байв.

Хэлэлцүүлэгт оролцож байгаа иргэдийн дундаас буруу талдаа жолооны хүрдтэй автомашины татварыг нэмэгдүүлэх, Улаанбаатар хотод хөдөлгөөнд оролцох хугацааг тогтоох дээр зоригтой шийдвэр гаргах, стандартыг мөрдүүлэх хэрэгтэй зэрэг санал гарлаа.

"Цаашид Лондон хот шиг түгжрэлийн төлбөртэй бүсийг байгуулах боломж бий"

Энэ тухай Монгол дахь Америкийн худалдааны танхимын Бодлого хариуцсан захирал Г.Жавхлантөгс “Нийслэлийн удирдлагууд нийтийн тээврийг сайжруулахад анхаарал тавьж байгаа боловч үүнийг яаралтайгаар шийдэх шаардлагатай.

Мөн аль болох нэг хүн, нэг автомашинтай хөдөлгөөнд оролцдог асуудлыг хязгаарлах хэрэгтэй төдийгүй буруу талдаа жолооны хүрдтэй автомашины татварыг нэмэгдүүлэх, аажимдаа бодлогоор хязгаарлах шаардлага бий гэж харж байна.

Түүнчлэн цаашид Лондон хот шиг түгжрэлийн төлбөртэй бүсийг байгуулах нь зөв. Лондон хотын тухайд төвийн бүс буюу хэтэрхий түгжрэл ихтэй хэсэгт оргил ачааллын цагаар өндөр төлбөр ногдуулдаг. Иймэрхүү асуудлуудыг шийдэх боломжтой.

Дээрээс нь хотын захын бүс буюу төвийн бүсийнхээ гадна талд их багтаамжтай зогсоолын асуудлыг шийдэх хэрэгтэй. Төвийн бүсээс гадуур автомашинаа тавиад хотын төв рүүгээ нийтийн тээврээр зорчин очиж, ажлаа амжуулаад буцаад гарч явдаг тогтолцоог хэрэгжүүлэх нь зөв” гэсэн юм.

"Израил улс нийтийн тээврийн чанар, үйлчилгээнд илүүтэй анхаарч, том дата ашиглаж зөв аргыг тодорхойлдог"

Түүнээс гадна PAI MATRIX компанийн гүйцэтгэх захирал Яайр Жакоб Порат Израил улсын туршлагаар хуваалцав.

Тэрбээр "Израил улс "Моби лай" гэх үйлчилгээг дэлхийн 60 улсад хэрэгжүүлж байгаа. Одоогоор энэ технологийг нэг сая гаруй хэрэглэгч ашиглаж байна. Энэхүү технологи нь жолооч нарын арга барилыг хянадаг төхөөрөмж гэж ойлгож болно. Өөрөөр хэлбэл бид жолооч нарын арга барил, түүнийг нь хянах системийг нэвтрүүлсэн гэсэн үг.

Мөн манай улс анхнаасаа буруу талдаа жолооны хүрдтэй машиныг огт импортоор оруулаагүй. Засгийн газрын зүгээс нийтийн тээврийн чанар, үйлчилгээнд илүүтэй анхаардаг бөгөөд үүнийг том дата ашиглаж зөв аргыг тодорхойлж, хэрэгжүүлж ирсэн” гэв.