Гэрийнхээ гадаа тоглож байгаад сураггүй болсон хоёр настай охиныг эрэн хайж байна

Увс аймагт гэрийнхээ гадаа тоглож байсан бага насны хүүхэд алга болжээ. 

Тодруулбал, тус аймгийн Улаангом сумын наймдугаар багийн Бага нуур гэдэг газарт гэрийнхээ гадаа тоглож байсан бага насны хүүхэд сураггүй алга болсон тухай дуудлагыг есдүгээр сарын 18-ны өдрийн 20:50 цагт онцгой байдлын албаныхан хүлээн авсан байна.

Улмаар аймгийн Онцгой байдлын газрын Эрэн хайх, аврах салбар, Цагдаагийн байгууллагын алба хаагчид, тус сумын Засаг даргын Тамгын газрын ажилтнууд, ар гэрийнхэн хоёр настай охиныг есдүгээр сарын 18-ны өдрийн 21:10 цагаас эхлэн эрэн хайж байна. 

Тухайн хүүхдийг өнөөдрийн 10:20 цагт Увс аймаг дахь Цагдаагийн газрын эрүүгийн мөрдөгч, цагдаагийн ахлах дэслэгч С.Төгссайхан олж, эрүүл мэндийн байгууллага болон гэр бүлийнхэнд хүлээлгэж өгчээ. 

Хүүхдийн биеийн байдал хэвийн байна гэж цагдаагийн байгууллагаас мэдээллээ.