Б.Тамир: Өргөө кино театр уран бүтээлийн орлогын 56.8 хувийг авдаг байсныг 50 хувь болгохоор тохиролцоод байна

Гэрэл зургийг MPA агентлагийн онцгой зөвшөөрөлтэйгөөр ашиглав

"Фантастик" продакшныхан Өргөө кино театраас уран бүтээлчдэд хүчээр тулгадаг гэрээний нөхцөлийн талаар мэдээлэл хийлээ.

Тус продакшны найруулагч Б.Тамир "Өргөө кино театрын гэрээний нөхцөлтэй бид санал нийлээгүй. Үндсэндээ давуу эрх эдлэх гэсэн хандлага гаргадаг байсан. Энэ тал дээр бид өөрсдийн саналаа хэлж, тохиролцоод байна. 

Хуульд кино уран бүтээлээс олсон орлогын 50 хувийг уран бүтээлчид, 50 хувийг кино театрт олгоно гэж заасан. Гэтэл Өргөө кино театр 56.8 хувийг авдаг байсан. Үүн дээр нэмээд бусад зардал гэхээр орлогынхоо 70 орчим хувийг зарцуулах нь уран бүтээлчдэд хүндрэлтэй байлаа. 

Тус кино театрыг бусад кино театртай адил байгаач гэдэг саналыг тавьсан юм. Ганцхан "Фантастик" продакшн биш, бүх уран бүтээлчидтэй энэ жишгээр гэрээ хийхээр болсонд баяртай байна" гэлээ. 

 

Гэрэл зургийг MPA агентлагийн онцгой зөвшөөрөлтэйгөөр ашиглав

Өргөө кино театрын 56 хувийн тухайд "IMAX кино театрыг Өргөө кино театрынхан Монголд анх оруулж ирсэн. Тус кино театрын үйл ажиллагааны зардал нь өндөр. Ийм байдлаар уран бүтээлийн орлогын 56 хувийн авах гэрээ хийгээд байсан. Иймээс бид гэрээндээ өөрчлөлт оруулах саналыг тавьсан" гэдгийг "Фантастик" продакшны жүжигчин Б.Ганчулуун хэллээ. 

Тус продакшны 15 дахь уран бүтээл болох “Зура II Цурам Ажиллагаа” УСК есдүгээр сарын 9-нд нээлтээ хийх юм байна. Уг кинонд Малайз, Сингапур, Хонконгийн жүжигчид оролцон тоглосноороо онцлог аж. Холливүүдийн түвшинд хүргэхийг зорьж тус киног бүтээсэн гэдгийг уран бүтээлчид онцолсон юм.