gimmeges.com

Үндэсний статистикийн хорооноос НҮБ-ын Хүүхдийн сантай хамтран Олон үзүүлэлт бүхий түүвэр судалгаа (MICS Plus)-г 2020 оны есдүгээр сараас хийж эхэлсэн. 

Энэ хүрээнд КОВИД-19 цар тахлын үед хүүхэд, гэр бүл, өрхийн нөхцөл байдлыг тодорхойлох өгөгдлийг бий болгож буй юм. 

Судалгааны дөрөвдүгээр шат 2021 оны дөрөвдүгээр сарын 13-24-нд үргэлжилсэн бөгөөд энэ явцад ажиглагдсан үр дүнгүүдээс хүүхдийн сайн сайхан байдалтай холбогдох хэсгийг онцлон хүргэж байна.

Тухайлбал, цар тахлын үед 0-4 настай хүүхдүүд ухаалаг утас, зурагт, компьютер хэр хугацаанд үзэж буйг тодруулахад судалгаанд оролцогчдын 14 хувь нь өдөрт дөрөв болон түүнээс дээш хугацааг дэлгэц харж өнгөрүүлж байжээ. Харин 29 хувь нь дээрх төхөөрөмжүүдийг огт үздэггүй гэж хариулжээ.

График 1. Дэлгэц харж өнгөрүүлж буй хугацаа, 0-4 настай хүүхдийн хувь, ухаалаг утас, ТВ, компьютер зэрэг дэлгэц харж өнгөрүүлж буй дундаж хугацаагаар

 

Эх сурвалж: ҮСХ (Монгол улс, ОҮБТС+ 4-р шат)

Дээрх графикаас харвал 0-4 насны хүүхдүүдийн 41 хувь нь гурваас дээш цагийн хугацааг дэлгэц үзэхэд зарцуулж байна.

Мөн өдөрт ямар нэг хэмжээгээр дэлгэц харж буй хүүхдүүдийн эцэг эх, асран хамгаалагчийн 46 хувь нь өдөрт хэтэрхий олон цагийг дэлгэц харж өнгөрөөж байгаа хүүхдэдээ санаа зовж буйгаа илэрхийлсэн байна. 

Хүүхдийн өсөлт хөгжил, дархлаа хүчтэй байхад чухал нөлөөлөх зүйлийн нэг нь хөдөлгөөн. Ялангуяа таваас доош насныханд булчингийн хөгжил, ясны хөгжил эрчимтэй явагдаж байдаг. Хөдөлж байж улам сайн хөгждөг байна.

Гэтэл гүйж, хөдөлж, хөгжих үедээ утас, зурагтыг удаан хугацаанд үзсээр байвал хүүхдийн сэтгэл санаа, дархлааны системд хэрхэн нөлөөлөх талаар сэтгэл зүйч Ц.Дэлгэрмэнд "Хүүхэд зурагт, гар утас үзэхдээ биеэ эвхэж суудаг. Энэ үед булчин чангарч, тархинд "Стресстэж байна" гэх дохио очих ба цусанд стрессийн даавар ялгарна. Хүүхэд өөрөө ч мэдэлгүй зурагтын өмнө стресстээд сууж байна гэсэн үг" хэмээн зөвлөж байв.

Иймд хүүхдүүдийнхээ утас, зурагт, компьютер зэргийг үзэх хугацааг багасгах шаардлагатай зайлшгүй байгаа юм.

Түүнчлэн өөр нэг онцлох үзүүлэлт нь хүүхдүүдийн биеийн жингийн өөрчлөлт юм. 

Судалгаанд оролцсон 0-4 настай хүүхдүүдийн 87 хувийнх нь биеийн жин нэмэгджээ

График 2. Биеийн жингийн өөрчлөлт, 0-4 настай хүүхдийн 2020 оны 11 дүгээр сараас хойш биеийн жин өөрчлөгдсөн хүүхдийн хувь, хэрхэн өөрчлөгдсөнөөр (Хариулагчийн мэдээлснээр)

 

Эх сурвалж: ҮСХ (Монгол улс, ОҮБТС+ 4-р шат)

Олон улсад цар тахлын улмаас сургууль, цэцэрлэгийг хааснаар хүүхдүүдийн биеийн жингийн өөрчлөл анхааралт татахуйц хэмжээнд хүрээд байгааг гэр бүлийнхэнд сануулсаар байгаа. Харин манай улсад хийгдсэн дээрх судалгаанд оролцсон хүүхдүүдийн 87 хувийнх нь биеийн жин нэмэгдсэн, гэхдээ үүнд эцэг эхчүүд санаа зовохгүй байгаа хэмээн хариулжээ. 

Мөн 0-4 настай хүүхдүүдийн 68-76 хувь насандаа тохирсон хугацаагаар унтаж амарч байжээ. 

График 3. Насандаа тохирсон байдлаар унтдаг хүүхэд

 

Эх сурвалж: ҮСХ (Монгол улс, ОҮБТС+ 4-р шат)

Эх сурвалж: ҮСХ