Владимир Путин: Оросыг хазах гэж оролдсон хэний ч шүдийг бид хуга цохих болно

Дэлхийн хоёрдугаар дайнд амь үрэгдсэн хүмүүсийн дурсгалыг сэргээх, хамгаалах зорилготой “Победа” байгууллагын зохион байгуулах хорооныхонтой өчигдөр видео холбоогоор уулзахдаа ОХУ-ын ерөнхийлөгч Владимир Путин улс орныг нь тараан бутаргах, хуваах гэсэн аливаа оролдлогод хатуу цохилт өгөхөө мэдэгджээ.

“Бүгд л манай орны нэг хэсгийг тасдах, салгахыг хүсдэг. Ингэхийг оролдсон хэний ч шүдийг бид хуга цохих болно” гэж тэр хэлсэн байна. Орос орны аварга том хэмжээ, байгалийн нөөц баялаг үргэлж өрсөлдөгчдийнх нь шуналыг хөдөлгөж байдаг тул шалтаг олдох бүрт хуваах, бутаргахыг санаархдаг гэж Путин энэ үеэр хэлжээ.

“Манай хаадын нэг нь ‘Оросын хүч чадал бүгдийг айлгадаг’ гэж хэлсэн байдаг” гэж тэр Гуравдугаар Александр хааны хэлсэн үгнээс эш татсан байна.

Асар их баялагтай Сибирийг нэг улс ганцаар эзэмших ёсгүй гэж өрнөдийн зарим удирдагчид ил тод ярьдаг тухай Путин бас дурджээ.

“Сибирийн асар их баялаг ганцхан Орост өмчлөгдөх ёсгүй” гэж АНУ-ын төрийн нарийн бичгийн дарга асан Мэделин Олбрайт хэлсэн гэх яриа байдаг ч албан ёсны эх сурвалжаар батлагдаагүй юм.

Эх сурвалж: Russia Today