SpaceX компани аварга пуужингийнхаа туршилтын загварыг анх удаа амжилттай газардууллаа
Өчигдөр АНУ-ын SpaceX компани Starship пуужингийнхаа туршилтын загварыг өндөрт хөөргөсний дараа анх удаа амжилттай газардуулжээ.
Олон дахин ашиглагдах Starship пуужинг ирээдүйн Ангараг гарагийн аялалд зориулан бүтээж байгаа юм.
Өмнөх дөрвөн туршилт нь бүгд амжилтгүй болж, газардахынхаа өмнө болон дараахан дэлбэрч байжээ.
SN15 гэж нэрлэсэн энэ удаагийн туршилтын пуужин нь өчигдөр орой Техасын Бока Чика дахь буудлаас хөөрч, 10 км өндөрт хүрснийхээ дараа хөдөлгүүрүүдээ унтрааж, хэвтээ байрлалд шилжин доош унаж эхэлсэн байна.
Газарт ойртох үеэр гурван тийрэлтэт хөдөлгүүрийн хоёр нь дахин ажиллаж, пуужингийн эх биеийг босоо байрлалд шилжүүлээд уналтын хурдыг сааруулж эхэлжээ.
Ингээд SN15 загвар анх хөөрсөн цэгээсээ холгүй талбайд эгц босоогоороо газардаж чадсан байна.
Пуужингийн газардах туршилт амжилттай болсныг SpaceX-ийн гүйцэтгэх захирал Илон Маск твиттер хуудсандаа зарлажээ.
Starship пуужингаар ирээдүйд 100 хүртэл тонн ачаа болон сансрын нисгэгчдийг сар, цаашлаад Ангараг гарагт тээвэрлэн хүргэх юм.
16 давхар байшингийн өндөртэй SN15 туршилтын загвар нь Starship пуужингийн ердөө дээд хагасыг орлож байгаа. Доод хагаст нь “super-heavy” ангиллын хүчирхэг хурдасгуурууд байрлах бөгөөд дээд хагасаа дэлхийн агаар мандлаас гаргах үүрэгтэй байх ажээ.
Эх сурвалж: The Verge
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
37 СЭТГЭГДЭЛТЭЙ
|
