Уламжлалт сэтгүүлзүй үл бүтэх улс төрчид, үл бүтэх бизнесменүүд, үл бүтэх эрх баригчдаас болж үргэлж бүдгэрч, буруутгагдаж, зөвхөн олны тусын тулд ажиллах үнэт зарчмаа алдсанаас үнэгүйдэж, хүчгүйдсэн эрин цаг, орон зайд бид амьдарч байна.
Энэ эрин, иргэд, олон нийт хариуцлагатай сэтгүүл зүйн бодит мэдээлэл болон зөвхөн “like”, “share”-т донтсон сошиал худал хуурмаг мэдээллийн хооронд “үнэн”-ийг хайж бүдчинэ.
Энэ эрин, иргэд сонгогчдын итгэл дааж, төрд төлөөлж суугаа “тэд” ард түмнээ аз жаргалтай, гачигдах дутагдах зовлонгүй, элбэг дэлбэг амьдруулахын төлөө амьсгалах завгүй зүтгэж байгаа “дүр” эсгэж элдэвлэнэ.
Энэ эрин, хууль дүрэм санаачилж, амьдралд тогтвортой хэрэгжүүлэх замаар гагцхүү ард иргэдийг айх айдасгүй, амар төвшин амьдруулах үүрэг хариуцлагатай ч “тэд” зөвхөн хар амиа хоохойлж, ахин дахин сонгогдохын төлөө л бүхнийг хийж, бүгдийг ялна.
Энэ эрин, ямар гарал үүсэл, ямар ч нийгмийн байдлаас үл хамааран, нийтэд, нийгэмд шударга ёс, ил тод засаглалыг бэхжүүлж, тогтоох чигч бодлого чанд мөрдөж, мөрдүүлэх зарчимтай ч “тэд” зөвхөн өөрсдөд нь албан тушаал, эрх ямба, хэргэм зэрэг хайрласан эзнээ л энэрч тэтгэнэ.
Коллектив баримтат киноны продюсер Bianca Oana
Оскар-2021 улаан хивсний ёслол дээр (Зургийг: https://www.eonline.com/)
Өглөө 08:00 цагаас (Монголын цагаар) эхэлсэн "Оскар-21" наадмын Шилдэг Баримтат Кино номинацид нийт 238 бүтээл өрсөлдөж, эхний 5 бүтээл тунасны нэг нь "Коллектив" баримтат кино. Өчигдөр буюу 2021 оны дөрөвдүгээр сарын 25-ны Ням гарагийн 11:50 минутад МҮОНТ "Коллектив" баримтат киног орон даяар нэвтрүүлэв. Энэ цаг үед хийгдсэн сэтгүүл зүйн хамгийн шилдэг бүтээл болох уг киног гаргасанд үзэгч түмэн ихэд таашааж байгаа харагдана. #MNBБаярлалаа.
Баримтат киноны төрөлд Оскарт нэр дэвшсэн 5 бүтээлийг сонирхоорой. (Нэрсийг англиар нь бичив.)
1. Нэр дэвшигч - Time
Нэгэн эмэгтэйн тэмцэл нь шударга бусаар хэрэг хүлээж хоригдсон эр нөхрөө шоронгоос суллаж байгаа гайхамшигтай бодит түүх.
2. Нэр дэвшигч - The Mole
Хүмүүний нас ахиж, хөгширч байгаа амьдралын жам ёсыг маш сонирхолтой, хөөр хөгжилтэйгөөр харуулсан үнэн түүх.
3. Нэр дэвшигч - Crip Camp
АНУ-ын экс Ерөнхийлөгч Барак Обама эхнэрийн хамт гүйцэтгэх продюсерээр нь ажилласан баримтат энэ кино Америкт хийсэн хөгжлийн бэрхшээлтэй иргэдийн “хувьсгал”-ын тухай сэтгэл хөдлөм түүх.
4. Ялагч - My Octopus Teacher
Хүн урт удаан хугацааны турш нэгэн бяцхан (A Mollusk-Нялцгай биетэй амьтны нэрийг монголоор хэлж мэдэхгүй юм. Уучлаарай.Трэйлэрээс та бүхэн хараарай.) амьтантай харилцаж байгаа амьдарлын тухай гайхам түүх.
5. Нэр дэвшигч - За тэгээд хамгийн сүүлд нь миний шунаж, шимтэж үздэг Collective баримтат кино .
Өнгөрсөн жил нээлтээ хийсэн сэтгүүл зүйн гайхалтай бүтээл. Та бүхэн өчигдөр МҮОНТ харсан тул би энд киноны тухай өгүүлэх нь илүүц. Шүүн тунгааж, ухаарч эргэцүүлэх сургамж санаа зөндөө, энэ баримтат киноноос.(Сэтгүүлчдэд сургамжтай зарим зүйлийг би зав чөлөө гаргаж байгаад залуу сэтгүүлчдэдээ зориулж бичнэ)
Дэлхийн нэр хүндтэй хэвлэл мэдээлэл, шинжээч, ажиглагчид Шилдэг Баримтат Кино номинацид үлдсэн дээрх 5 шилдэг киноноос ямар бүтээл Оскар гардах тухай олон таамаг дэвшүүлж байлаа. Ихэнх нь My Octopus Teacher бүтээл энэ жилийн Оскар авна гэдэгт итгэлтэй байсан. Тэдний таамаг зөрсөнгүй.
Ямартай ч миний хувьд бүтэн жилийн турш цуцашгүй хөдөлмөрлөж, хүн төрөлхтний өмнө тулгарч байгаа нийтийн эрүүл мэндийн системийн уналт, тогтолцооны ялзрал гажуудлыг илчилж дэлгээд зогсохгүй системийн бодит өөрчлөлт шинэчлэлт авчирсан "Коллектив" баримтат бүтээлийн уран бүтээлчдийн төлөөлөл "Оскар-2021" улаан хивсэн дээр алхаж, мөн 238 бүтээлээс энэ жилийн дэлхийн сор 5 баримтат бүтээлийн нэгээр шалгарсан нь бахархам.
Хараат бус, хариуцлагатай сэтгүүл зүй бол хүмүүнлэг, ардчилсан, иргэний нийгмийн ХҮЧИЛТӨРӨГЧ нь гэдгийг би "Коллектив" киноноос ухаарсан олон эргэцүүлэл ухаарлын нэг яах аргагүй мөн.
Хэдий хатуу бэрх бэрхшээл сорилтын өмнө байгаа ч миний Монголын сэтгүүлчид тэр дундаа #MNB болон бие даасан эрэн сурвалжлагч сэтгүүлчдийн бүтээл хүн төрөлхтнийг ухааруулж эргэцүүлэм, сэтгэл хөдөлгөсөн гайхам түүх бүтээх цаг тун холгүй санагдана.
Тийм ээ, гэхдээ л “тэд” биднээс илүү мундаг ажлаа хийсээр. Харин одоо “бид” ажил үүргээ маш сайн хийх юм шүү.
PS
Нийтлэлийг бичсэн: Дэмчигийн Оюунчимэг, МҮОНТ-н ахмад сэтгүүлч,
Монголын Олон Нийтийн Медиэ Контент Сангийн үүсгэн байгуулагч