"Дархан-Уул аймагт төмөр замчдын тэмцээнд оролцсон ОХУ-ын иргэд шинжилгээ хийлгэсэн байсан учир халдвар тэднээр дамжсан гэж хэлэхгүй"
ХӨСҮТ-ийн Тандалт, судалгааны албаны дарга А.Амбасэлмаа болон ЭМЯ-ны хэлтсийн дарга Д.Нарангэрэл нар сэтгүүлчдийн асуултад хариулав.
-COVID-19-ийн өвчтөнүүдэд уламжлалт анагаах ухааны чиглэлээр эмчилгээ хийж байгаа юу?
Д.Нарангэрэл: - Уламжлалт анагаах ухааны чиглэлээр манай эмнэлгийн тусламжийн газар болон ЭМЯ-ны эмнэлгийн зөвлөх баг ажиллаж байгаа. Мөн манай ардын эмнэлгийн эмч нар коронавируст халдвараас урьдчилан сэргийлэх талаарх зөвлөмж зөвлөгөө ч өгч байсан.
Манай уламжлалт анагаах ухаан бол дэлхий дахинд хосгүй анагаах ухааны нэг. Уламжлалт анагаах ухаан бол ялангуяа биеийн эсэргүүцэл сайжруулах, дархлааг дэмжихэд үнэхээр үр дүнтэй.
Иймд ЭМЯ-наас аарц, чацаргана, барагшуун, хунчир хэрэглэх зэргээс эхлээд цэгэн иллэг хийх гэх мэт уламжлалт аргуудаас зөвлөж байгаа хэрэг.
-Өвчтөнүүдээс амьсгалын аппаратад орсон тохиолдол бий юу?
Д.Нарангэрэл: Монгол Улсад 428 ширхэг амьсгалын аппарат бий. Цаашдаа бид амьсгалын аппаратын тоог нэмэгдүүлэхээр ажиллаж байна. Одоогоор коронавирусийн халдвар авсан хүмүүсээс амьсгалын аппаратад орсон хүн байхгүй.
-БНХАУ-аас ирсэн иргэд халдвар хамгааллын дэглэм алдсан гэдэг нь үнэн үү. Мөн Дархан-Уул аймагт 11 сарын 6-нд болсон Төмөр замчдын тэмцээнд ОХУ-аас хүмүүс ирж оролцсон гэсэн мэдээлэл байна. Тухайн хүмүүсээ сайн тогтоож шалгасан уу?
А.Амбасэлмаа: -Хятад улсаас орж ирсэн иргэдийг мөн л бид орж ирэхэд нь шинжилгээ хийж, 21 хоног тусгаарлаж, хяналтдаа авч явсан.
Харин төмөр замчдын тэмцээний үед ганц хоёр ОХУ-ын иргэн байсан. Тэдгээр хүмүүс тухайн үедээ эрүүл мэндийн шинжилгээтэй байсан учраас түүгээр дамжиж халдвар орж ирсэн гэж хэлэхгүй.
ВИДЕО:
