Өндөрлөг газарт төрсөн хүүхдийн өсөлт, хөгжил сул байдгийг судлаачид тогтоожээ

Даваа гарагт анагаах ухааны JAMA Pediatrics сэтгүүлд нийтлэгдсэн судалгааны тайланд хүүхдийн өсөлт, хөгжил нь далайн түвшнээс хэр өндөр газарт төрснөөсөө хамаарч байгааг харуулжээ.

Өөрөөр хэлбэл төрсөн газар орны өндөр нэмэгдэх тусам хүүхдийн биеийн өсөлт, хөгжилд муугаар нөлөөлдөг нь харагдсан байна.

Тухайлбал далайн түвшнээс дээш 500 метр хүртэл өндөр газарт мэндэлсэн хүүхдийн өсөлтийн хувь хэмжээ Дэлхийн Эрүүл Мэндийн Байгууллагын тогтоосон стандартад хүрч байжээ.

Харин 500 метрээс дээшлэх тусам хүүхдийн өсөлтийн хэмжээ тухайн насандаа байх ёстой стандартад хүрэхгүй болж эхэлсэн байна.  

Далайн түвшнээс 1,500 метрээс дээш өндөрт хүүхэд анхнаасаа богино биетэй төрж, цаашдын өсөлт нь стандарт хэмжээнээсээ улам холдож, гүйцэхээргүй болж байгааг тогтоожээ.

Судалгаанд дэлхийн 59 орны 950,000 хүүхдийн нас насны биеийн өсөлт хөгжлийн тоо баримтыг хамруулсан байна. 

“Далайн түвшнээс 1,500 метрээс дээш өндөрт манай дэлхийн 800 сая гаруй хүн амьдарч байна. Тэдгээрийн гуравны хоёр нь Африк болон Ази тивийн орнуудад оногдож байна” гэж дээрх судалгаанд хамтран оролцсон Олон Улсын Хүнсний Бодлогын Хүрээлэнгийн ахлах судлаач Калле Хорвонен ярьжээ.

Гэхдээ үүнд зөвхөн хөгжил буурай орнууд багтаагүй, бас 1,500 метрээс дээш өндөрт оршдог АНУ-ын хотууд багтаж байгааг дурдсан байна.

Тухайлбал Колорадо мужийн Аспен, Брекэнриж, Теллурид хотууд, Нью Мексико мужийн Санта Фе хот нь далайн түвшнээс 2,100-аас дээш метрийн өндөрт оршдог ажээ.

Хүүхдийн өсөлт хөгжил сул байхаас гадна ийм өндөрлөгт хүүхэд төрүүлэх нь эхийн амь насанд илүү эрсдэл учруулдгийг судлаачид тогтоосон байна.

Энэхүү ажил нь хүүхдийн биеийн өсөлт хөгжлийг төрсөн газар нутгийн өндөртэй холбож судалсан эхний алхам бөгөөд цаашид эх хүүхдийн эрүүл мэндэд үзүүлэх өндөрлөг газрын сөрөг нөлөөг хэрхэн багасгах арга замыг тодорхойлох шаардлагатай гэж судлаачид дүгнэжээ.

Эх сурвалж: CNN