ВИДЕО: Төрсөн өдрийн дууг хоёр удаа дуулаад гараа угаахад 20 секунд болчихдог

-Зөвлөгөөг дахин нийтлэв-

Анагаах ухааны доктор Д.Мандахнаран шинэ коронавирусийн халдвараас сэргийлэхийн тулд гараа хэрхэн зөв, сайн угаах талаар зөвлөж байна.

Дэлхийн эрүүл мэндийн байгууллагаас коронавирусийн халдварт өвчнөөс хэрхэн хамгаалах талаар зөвлөгөө өгч байгаа билээ. 

Эдгээр зөвлөгөөг дурдвал,

1. Амны хаалт зүүх
2. Олон нийтийн газраар явахгүй байх
3. Гараа зөв, сайн угаах юм.

Шинэ коронавирусийн тухайд гадаргуу нь арьстай байдаг. Үүнийг савангийн молекулаар уусгаж цэвэрлэдэг. Савангийн молекул дахь антифи хэмээх бодис нь вирусийн мембрантай холбогдон задалж, усаар урсгаж явуулдаг ач холбогдолтой.

Энэ вирус нь гадаргуу дээр тэсвэр өндөртэй гэдэг нь тогтоогдсон тул гарыг удаан хугацаанд маш сайн угаах нь чухал. Гараа угаахдаа хамгийн багадаа 20 секунд угаах нь зүйтэй.

Гараа хэрхэн угаах талаар зөвлөгөөг хүргэе.

• Крантаа тохойгоороо онгойлгоно. Гарынхаа хүрэлцдэг хэсгээр крантанд хүрэхгүй байх.
• Тохойгоороо крантаа онгойлгож гараа норгоод мөн тохойгоороо хаана.
• Үүний дараа савандаа хүрэхдээ гарынхаа ард талаар буюу хоол хүнсэнд хүрэлцдэггүй хэсгээрээ савангаа авна.
• Ингээд угаахдаа гарынхаа хуруунууд, салаа, ард тал, бугуйн хэсгээ оролцуулаад дунджаар 20 секунд угаана. Үүний дараа тохойгоороо крантаа нээж гараа дээрээс нь доош нь юунд ч хүргэхгүйгээр савангаа усаар урсгана.

Мэс заслын эмч нар гараа маш сайн угаадаг. Тэд гараа юунд ч хүргэхгүй дээрээс нь доош нь усаа урсгачихдаг.

20 секундийн багцаа авахад төрсөн өдрийн дууг /Happy birthday to you/ хоёр удаа дуулаад гараа угаахад болчихдог.

Гараа зөв угааж хэвшвэл зөвхөн коронавирусээс гадна манай оронд түгээмэл байдаг томуу, гэдэсний халдварт аюулт өвчнүүдээс өөрийгөө болон гэр бүлээ хамгаалах ач холбогдолтой юм.