Уншиж байна ...
Зураг
Зураг
ХУУЧИРСАН МЭДЭЭ: 2019/12/04-НД НИЙТЛЭГДСЭН

Д.Одбаярыг БНСУ-д амьдарч буй монголчуудаас уучлалт гуйж, цэцийн гишүүнээс огцрохыг шаардлаа

Г.Номин, iKon.mn
2019 оны 12 сарын 4
iKon.MN
 
Гэрэл зургийг mpa.mn

"Ялгаварлалыг хариуцлагажуулъя нэгдэл"-ээс ҮХЦ-ийн дарга асан Д.Одбаярыг БНСУ-д амьдарч буй монголчуудаас уучлалт гуйж, цэцийн гишүүнээс огцрохыг шаардан өнөөдөр мэдээлэл хийлээ.

 
Гэрэл зургийг mpa.mn

"Ялгаварлалыг хариуцлагажуулъя нэгдэл"-ийн зохицуулагч Э.Аззаяа "Иргэд, олон нийтийн зүгээс ҮХЦ-ийн дарга асан Д.Одбаярын ёс зүйгүй үйлдэлд хариуцлага хүлээлгэхийг шаардсан. Түүний холбогдсон хэрэг БНСУ-д ажиллаж амьдарч байгаа монголчуудыг ичгэвтэр байдалд оруулаад зогсохгүй, ажил амьдралд нь бодитойгоор хохирол учрах болсон талаар албан бичгийг "БНСУ дахь эмэгтэйчүүдийн нэгдсэн холбоо"-ноос бидэнд ирүүллээ.

Д.Одбаяр нь цэцийн даргын албан тушаалаа өгөөд цэцийн гишүүний ажлаа үргэлжлүүлэн хийж байгаа нь ёс зүйгүй, ҮХЦ-ийн гишүүний өндөр нэр хүндийг уландаа гишгэж, олон нийтийн дургүйцлийг маш их хүргэж байгаа.

Нөгөө талаар Монгол Улс хууль зүйн хувьд бэлгийн дарамт үзүүлэгчдэд хариуцлага тооцож чадахгүй байгаад бухимдаж байна. Ийм үйл явдал Монгол Улсад болсон бол хохирогчийг буруутгаад, ялангуяа эрх мэдэлтэй өндөр албан тушаалтай дарамтлагчид хариуцлагаас бултаад гарах боломж байсаар байгаад бид харамсаж байна" гэлээ.

Тус нэгдлээс тодорхой гурван шаардлагыг гаргаснаа танилцууллаа.

  1. Д.Одбаярыг цэцийн гишүүнээс өөрийн хүсэлтээр огцрох,
  2. Олон улсад Монгол Улсын нэр хүндийг унагааж, БНСУ-д ажиллаж амьдарч байгаа монголчуудыг ичгэвтэр байдалд оруулсныхаа төлөө албан ёсоор уучлалт гуйх,
  3. Бэлгийн дарамтлагчдад Эрүүгийн болон Зөрчлийн хуулиар ёс зүйн хариуцлага тооцдог болохыг шаардаж байна.

БНСУ-д Монгол Улсын 50 мянга орчим иргэн амьдарч байгаа иргэдийн эрх ашгийг хамгаалах зорилготой төрийн бус байгууллагуудын нэг болох "БНСУ дахь эмэгтэйчүүдийн нэгдсэн холбоо"-ны мэдэгдэлд гарч буй хүндрэлүүдийн талаар дурджээ. Тодруулбал, Банкны карт захиалахад нэг хоногт гардаг байсан бол Монгол Улсын иргэдийг 3-5 хоног хүлээлгэх, сурч буй эмэгтэйчүүдэд "Монгол эмэгтэйчүүд хэр баргийн бэлгийн дарамтыг тоодоггүй" гэсэн байдлаар хүнд байдалд оруулж байна хэмээжээ.

 
Гэрэл зургийг mpa.mn

"Ялгаварлалыг хариуцлагажуулъя нэгдэл"-ийн гишүүн Х.Номингэрэл "Манай улсад дуулиан шуугиан тарьсан асуудлууд өдөр бүр гарч байдаг. Үүнээс болоод заавал эцсийг нь үзэж шийдэрвэрлэх ёстой асуудлууд орхигдох тохиолдол ажиглагддаг. Тиймээс бид дахин хэргийг сөхөж ярьж байна.

Д.Одбаяр гэдэг хүний хувьд нэгдүгээрт бэлгийн дарамт үзүүлсэн, мөн архидан согтуурч, биеэ хянах чадваргүй байснаа өөрөө хүлээн зөвшөөрсөн байгаа юм. Ер нь бол бэлгийн дарамт болсон болоогүй хамаагүй Монгол Улсын хууль зүйн салбарын хамгийн дээд албан тушаалыг хашиж байгаа энэ хүн согтуурна гэдэг бол ёс зүйн зөрчил. Гэтэл даргын ажлаа өгөөд гишүүнээрээ үлдэж байгаа нь ард түмнийг хуурч байгаа хэлбэр юм. Энэ зүйлийг бид мартахгүй, цаашдаа ийм асуудал дээр дугарсаар байх болно. Цэцийн даргын хувьд хийж болохгүй, цэцийн гишүүний хувьд хийж болдог бэлгийн дарамт гэж байхгүй.

Эрүүгийн хуульд 2015 онд Ажлын байрны бэлгийн дарамтын асуудлыг оруулсан ч хэрэгжиж эхлэхээс нь өмнө буюу 2017 онд хүчингүй болгочихсон. Зөрчлийн хуулинд байхгүй, Хөдөлмөрийн хуулинд оруулна гэж яриад тус хууль батлагдахгүй 3, 4 жил болж байна. Ёс зүйн дүрмүүд дээр алдаг оног байгаа. Гэтэл ҮХЦ-ийн дарга гэдэг албан тушаалтан хэр баргийн хууль зөрччихсөн байхад хариуцлага тооцохооргүй хуулиар хамгаалагдсан. Энэ хүнд хариуцлага тооцъя гэвэл газар дээр нь, нотлох баримттай нь илрүүлсэн тохиолдолд боломжтой. Ердөө өөрийн хүсэлтээр огцрох л боломж байна.

Ер нь бол төрийн ямар ч өндөр албан тушаалтан бэлгийн дарамт үзүүлсэн тохиолдолд хариуцлага тооцох эрх зүйн орчныг бүрдүүлэхийг бид шаардаж байгаа" хэмээн ярилаа.

 
Гэрэл зургийг mpa.mn

Цэцийн дарга асан Д.Одбаярын холбогдсон асуудлыг монголын нэр нөлөө бүхий албан тушаалтнууд гуйвуулсан, нийгэмд байдаг энгийн үйлдэл мэтээр тайлбарласан, тоглоом шоглоом болгосон мэдээлэл цацагдаж байгаа нь байж боломгүй асуудлыг нийгэмд хүлээн зөвшөөрүүлэхээр зүтгэж буй мэт харагдаж байгаа хэмээн "Ялгаварлалыг хариуцлагажуулъя нэгдэл"-ийнхэн хэлж байв.