Цэцийн гишүүд хуралдаж шийдвэрээ гаргажээ.

Үндсэн хуулийн цэцийн нийт 9 гишүүн Д.Одбаярыг Үндсэн хуулийн цэцийн даргын албан тушаалаас чөлөөлөхийг санал нэгтэйгээр дэмжсэн байна.

Үндсэн хуулийн цэц нь 9 хүний бүрэлдэхүүнтэй:

1. Д.Одбаяр /Дарга/
2. Н.Чинбат /Гишүүн/
3. Д.Солонго /Гишүүн/
4. Ш.Цогтоо /Гишүүн/
5. Ш.Солонго /Гишүүн/
6. Б.Буяндэлгэр /Гишүүн/
7. Ц.Нанзаддорж /Гишүүн/
8. Г.Туулхүү /Гишүүн/
9. Г.Баясгалан /Гишүүн/

Гэхдээ түүнийг зөвхөн цэцийн даргын албан тушаалаас нь чөлөөлж байна. Харин цэцийн гишүүнээс чөлөөлөх асуудлыг УИХ шийднэ. Д.Одбаярыг УИХ-аас цэцийн гишүүнээр томилж байсан тул хуулийн дагуу чуулганаар хэлэлцэх учиртай. 

Монгол Улсын Үндсэн хуулийн цэцийн нийт гишүүдийн хуралдаан 2019 оны 11 дүгээр сарын 22-ны өдөр болж, Монгол Улсын Үндсэн хуулийн цэцийн дарга Д.Одбаярын албан тушаалаасаа чөлөөлөгдөхөөр гаргасан хүсэлтийг хэлэлцлээ.

Хуралдааныг Монгол Улсын Үндсэн хуулийн цэцийн тухай хуулийн  6 дугаар зүйлийн 6 дахь хэсгийг үндэслэн Үндсэн хуулийн цэцийн гишүүн Н.Чинбат удирдаж хийлгэв.

Хуралдааны эхэнд  Цэцийн нийт гишүүдэд Үндсэн хуулийн цэцийн даргын хүсэлтийг танилцуулж, түүний тайлбарыг сонссоны дараа гишүүд асуулт тавьж, хариулт авлаа.

Хуралдаанд оролцсон гишүүд Д.Одбаярыг Монгол Улсын Үндсэн хуулийн цэцийн даргаас  чөлөөлөх хүсэлтийг өөрийнх нь саналын дагуу ил санал хураалт явуулж шийдвэрлэв.

Үндсэн хуулийн цэцийн нийт 9 гишүүн Доржийн Одбаярын  хүсэлтийг санал нэгтэйгээр хүлээн авч,  түүнийг Үндсэн хуулийн цэцийн даргын албан тушаалаас  чөлөөллөө гэж Үндсэн хуулийн цэцийн хэвлэл, мэдээллийн төлөөлөгч мэдээлэв.