Цагдаагийн байгууллагад энэ оны эхний арван сарын байдлаар залилах гэмт хэрэг 4,125 бүртгэгджээ.
Эдгээрээс ихэнхийг нь нь цахим мэдээлэлтэй холбоотой залилангийн гэмт хэрэг эзэлж байгааг Цагдаагийн ерөнхий газрын хэвлэлийн төлөөлөгч, цагдаагийн ахмад М.Мөнхшүр хэллээ.
Тодруулбал, олны танил эрхмүүдийн нэр, зургийг ашиглан хуурамч акаунт нээн иргэдийг мэхлэх гэмт хэрэг ихсэж буй аж.
Тэрбээр "Олны танил хүмүүсийн зургийг ашиглан уралдаан зарлаж, шагналын 10 хувийг буцааж авах тул мөнгөө шилжүүлнэ үү... гэх мэтээр иргэдийг залилдаг этгээдүүдийг Сонгинохайрхан дүүрэг дэх цагдаагийн нэгдүгээр хэлтсийн Эрүүгийн хэлтсийн алба хаагчид илрүүлэн, шалгаж байна. Уг этгээдүүд 2000 оны гурван залуу байсан бөгөөд ихэвчлэн дансандаа мөнгө байршуулж, бусдыг залилдаг байсан нь тогтоогдсон. Урьдчилсан байдлаар 166 хохирогч тогтоогдсон ба тус бүр 56,000 төгрөг шилжүүлж байсан нь тогтоогдоод байна.
Иймд энэ төрлийн үйлдлээр хохирсон иргэд байвал Сонгинохайрхан дүүрэг дэх цагдаагийн нэгдүгээр хэлтэст хандаж, мэдээллээ шалгуулахыг анхааруулж байна.
Иргэд цахим орчинд зарласан уралдаанд оролцож байгаа тохиолдолд, эсвэл ямар нэгэн байдлаар гүйлгээ хийх шаардлагатай болсон үед гүйлгээний утга, эзэмшигчийн нэр, данс зэргийг сайтар нягталж энэ төрлийн залилангаас урьдчилан сэргийлэхийг анхааруулж байна.
Үүнээс гадна Сонгинохайрхан дүүрэг дэх цагдаагийн нэгдүгээр хэлтсийн хариуцсан нутаг дэвсгэр буюу 19 дүгээр хорооны нутаг дэвсгэрээс нярайн цогцос олдлоо гэх мэдээлэл иргэнээс ирсэн. Уг хэрэг дээр цагдаагийн байгууллагууд шалгалтын ажиллагаа явуулж байна. Нярайтай холбоотой мэдээллийг дэлгэрэнгүй өгөх боломжгүй” гэв.
Америк доллар
