Хонг Конгийн их сургуулиуд гадаад оюутнуудаа буцааж эхэллээ

Сүүлийн өдрүүдэд Хонг Конгийн их сургуулиуд цагдаа нар болон тэмцэгчдийн мөргөлдөөний талбар болоод байна. Лхагва гарагт гарсан мөргөлдөөнд хэд хэдэн хүн бэртэж, нэг хүн амиа алдсан юм.

Өчигдөр хотын засаг захиргааны нэг ажилтан тэмцэгчдийн шидсэн зүйлд оногдож, хүнд бэртээд эмнэлэгт хүргэгдсэн бол 15 настай хүүхэд бас мөргөлдөөний үеэр шидэгдсэн зүйлд толгойгоо цохиулснаас гавлын яс нь бяцарсан байна. Хонг Конгийн Цуен Ван өртөөний ойролцоо 30 орчим насны залуу өндрөөс унаж амиа алдсан байсныг цагдаа нар олжээ.

Нөхцөл байдал хүндэрсэнтэй холбоотой өнөөдөр Хонг Конгийн хэд хэдэн их сургуулиуд гадаад оюутнуудаа нутаг буцаах шийдвэр гаргасан байна.

Тухайлбал Данийн Техникийн Их сургууль (Technical University of Denmark) өөрийн 36 гадаад оюутанд эх орондоо буцах заавар өгчээ.

Норвеги улсын гадаад хэргийн яам Хонг Конг дахь өөрийн оюутнуудад аюулгүй байдлаа хангаж, сонор сэрэмжтэй байхыг зөвлөсөн мэдэгдэл гаргасан байна. 

Мягмар гарагт цагдаа нар Хонг Конгийн Хятад Их сургуулийн (Chinese University of Hong Kong) байранд нэвтэрч, тэмцэгч оюутнуудтай мөргөлдөөн үүсгэсэн юм. Өнөөдөр тус сургуулийн хотхоныг оюутнууд хориглолт болгон ашиглаж байна.

Их сургуулийн лабораторийг шатамхай бөмбөг үйлдвэрлэх газар болгож, тэмцэгчид, гэмт хэрэгтнүүд дотуур байранд нь үүрлэж байгаагаас ажиллагаа явуулах болсноо Хонг Конгийн цагдаа тайлбарласан юм.

Мөргөлдөөний үеэр тэмцэгчдийн зүгээс 400 орчим шатамхай бөмбөг шидсэн бол цагдаа нар 1,500 гаруй удаа нулимс асгаруулагч хий цацаж, 1,300 орчим резинэн сумаар бууджээ.

Өнөөдрийн байдлаар Хонг Конгийн нийтийн тээврийн ихэнх хэсэг зогсож, сургуулиуд хаалгаа бариад байна. Тус хотын боловсролын газар Баасан гарагаас Ням гараг хүртэл бүх бага, дунд сургуулиудыг хаах шийдвэр гаргажээ.

Хэд хэдэн их сургуулиуд хичээлээ хааж, онлайнаар заах аргад шилжсэн байна.

Эх газрын Хятадаас ирсэн оюутнууд олноор нутаг буцаж байгаагаас хөрш Шэнжэнь хотын зочид буудлуудын захиалга нэмэгдсэн тухай хэвлэлүүд мэдээлжээ.

Хонг Конг дахь Тайваний төлөөлөгчийн газар өөрийн улсын 71 оюутныг нутаг буцахад тусалсан тухай мэдээлсэн байна.

Эх сурвалж: The Guardian