Филиппиний нэг шоронд жил бүр 5,000 гаруй хоригдол нас бардаг

Филиппин улсын томоохон шоронгийн хоригдлуудын 20 хувь нь жил бүр амиа алддаг тухай тоо баримтыг албаныхан дэлгэжээ.

Пүрэв гарагт тус улсын парламентад мэдээлэл өгөхдөө New Bilibid Prison (NBP) шоронгийн эмнэлгийн дарга Эрнесто Тамаяо уг тоо баримтыг танилцуулсан байна.

Шоронгийн ачаалал нэмэгдэж, хэт олон хоригдол нэг дор хоригдож байгаа нь халдварт өвчин тарах, аллага хүчирхийлэл гарах нөхцөл бүрдүүлж, жил бүр 5,200 орчим хоригдол амиа алддагийг тэр баталжээ.

Шоронгийн удирдлагууд авлига авч гэмт хэрэгтнүүдийг хугацаанаас нь өмнө суллах, эсвэл шорон дотор тусгай хангамж эдлүүлэх зэрэг хууль зөрчсөн үйлдэл гаргадаг тухай дуулиан Филиппиний нийгэмд тарж, ард иргэдийг бухимдуулах болсон тул тус улсын сенат мөрдөн шалгах ажлыг эхлүүлээд байгаа юм.

Филиппиний ерөнхийлөгч Родриго Дутерте хар тамхины эсрэг дайн зарласнаар шоронгуудын ачаалал эрс нэмэгдсэн гэдэг. Тухайлбал 18 метр квадрат талбайтай өрөөнд 85 хүнийг хорьсон тохиолдол ч байгааг эх сурвалжууд мэдээлж байна.

Филиппин улсын шоронгуудын нийт хоригдлуудын тоо 2018 оны тавдугаар сарын байдлаар 188,278 хүрээд байгааг World Prison Brief тайланд дурджээ.

Тус улс 2006 оноос эхлэн цаазын ялыг түдгэлзүүлээд байгаа боловч сүүлийн үед сэргээн хэрэглэх талаар яригддаг болсон. "Шоронгийн нөхцөл ийм байхад бидэнд цаазын ялыг сэргээх шаардлага алга" гэж Эрнесто Тамаяо сенатын гишүүдэд хэлжээ.

Эх сурвалж: CNN