QR кодыг зохион бүтээсний 25 жилийн ой болж байна

Өнөөдөр дэлхий дахинд өргөн хэрэглэгдэж байгаа QR (Quick Response) кодыг 1994 онд Японы нэгэн инженер зохион бүтээсэн юм.

Энэ онд QR технологийг зохион бүтээсний 25 жилийн ой тохиож байна. Одоо 62 настай, Denso Wave Inc. компанийн ахлах инженер Масахиро Хара ойг тохиолдуулан саяхан хэвлэлд ярилцлага өгчээ.

Тэрээр анх QR кодыг үйлдвэрийнхээ үйл ажиллагааг хянахад зориулан бүтээж байсан гэнэ. Гэвч шинэ технологи нь сүүлд ухаалаг гар утасны чухал хэсэг болж, маш олон салбарт нэвтэрсэн юм.

Denso компани QR кодны стандартыг үнэ төлбөргүй тарааж, Японы болон гадаадын компаниудад өргөнөөр хэрэглэх боломж олгосон байна.

Энгийн баар код 20 тэмдэгтийг багтдаадаг бол хоёр хэмжээстэй QR код 7,000 хүртэл тэмдэгт багтаадаг.

Сүүлийн жилүүдэд QR кодыг төлбөр тооцооны системд өргөнөөр ашиглах болсон. Үүнтэй холбоотой нууцлал, аюулгүй байдлын асуудал сөхөгдөж байгаа. Сүүлд нууцлалтай QR, хуулбарлахаас хамгаалсан QR зэрэг шинэ технологиуд гараад байна.

Масахиро Хара “Өнөөдөр энэ технологийг төлбөр тооцоонд өргөн хэрэглэдэг болсон. Тиймээс QR-ын аюулгүй байдлыг сайжруулах нь миний үүрэг гэж би боддог” гэж ярьжээ.

Эх сурвалж: Asahi Shimbun