Боинг компани зарагдахгүй байгаа онгоцнуудаа ажилчдынхаа автомашины зогсоолд байрлуулжээ
Дараалсан хоёр ослын дараа Боинг компанийн Boeing 737 Max загварын нисэх онгоцнуудын эрэлт буурч, дэлхийн томоохон авиа компаниуд захиалгаа цуцлах болсон юм.
Захиалга нь цуцлагдсан олон нисэх онгоцнуудаа хадгалах орон зайн асуудал Боинг компанид тулгараад байгаа гэнэ. Сиэтл хотын KING-TV сувгийн мэдээлж байгаагаар тус компани зарим онгоцнуудаа ажилчдынхаа машины зогсоолд байрлуулаад байгаа гэнэ.
Өнгөрсөн оны арав, энэ оны гуравдугаар саруудад Индонез, Этиопт дараалан гарсан ослын улмаас нийтдээ 346 хүн амь үрэгдээд байгаа. Хоёр осолд Boeing 737 Max загварын нисэх онгоцны программын алдаа нөлөөлсөн гэж дүгнэж байна.
Гуравдугаар сараас эхлэн дэлхийн улс орнууд ийм загварын нисэх онгоцнуудаа газардуулж, захиалгуудаа цуцлах болсон билээ. Үр дүнд нь Боинг компанийн нэгдүгээр улирлын санхүүгийн тайлан $1 тэрбум орчмын алдагдалтай гарсан байна.
Блүүмбэргийн мэдээлснээр Боинг компани захиалга нь цуцлагдсан 737 Max загварын нисэх онгоц нэг бүрийг зогсоолд хадгалахад сар бүр $2,000 орчмыг зарцуулж байгаа гэнэ.
Ингэснээр тус компанийн хөрөнгийн менежмэнтийн зардал есдүгээр сард $12 тэрбум болж нэмэгдэнэ гэж Блүүмбэргийн мэргэжилтнүүд тооцоолжээ.
Эх сурвалж: Business Insider
