Сэжигтэй баримт илэрсний дараа Boeing 737 Max онгоцнуудын нислэгийг зогсоох шийдвэрийг АНУ гаргалаа

Өчигдөр буюу Лхагва гарагт АНУ-ын ерөнхийлөгч Дональд Трамп өөрийн улсад нисэж буй бүх Boeing 737 Max загварын онгоцнуудыг яаралтай газардуулах шийдвэр гаргажээ.

Тэрээр Цагаан ордонд сэтгүүлчидтэй уулзахдаа “Америкийн ард түмний, цаашлаад бүх хүмүүсийн аюулгүй байдлыг нэгдүгээрт тавих үүднээс” ийм шийдвэр гаргаснаа тайлбарласан байна.

Даваа гарагт АНУ-ын Холбооны Нислэгийн Захиргаа (FAA) богино хугацаанд дараалан хоёр удаа осолдоод байгаа Боингийн нисэх онгоцыг аюулгүй гэж дүгнэж байв.

Харин хоёр хоногийн дараа шийдвэрээсээ буцах болсон нь осолдсон хоёр онгоцны хооронд ижил төстэй шинж тэмдэг илэрсэнтэй холбоотой гэнэ. Тодруулбал хиймэл дагуулаас авсан нисэх онгоцнуудын замын маршрут зураглалыг харьцуулахад яг ижил хэлбэртэй байгаа нь тэдгээрийг адилхан шалтгаанаар осолдсон гэх сэжигийг бий болгож байгаа тухай FAA байгууллагын тэргүүний үүрэг гүйцэтгэгч Даниэл Элвелл мэдээлжээ.

Гэхдээ шалгалтын ажил дөнгөж эхний шатандаа яваа тул үүнээс илүү дэлгэрэнгүй мэдээлэл өгөхөөс татгалзсан байна.

Этиопын осолдсон онгоцны хар хайрцгийг Франц улс руу илгээж шинжлүүлэх гэж байгааг тэр бас мэдээлжээ. 

Өчигдөр өглөө Канад улс мөн Boeing 737 Max загварын нисэх онгоцнуудыг өөрийн агаарын орон зайд нисгэхийг хориглосон байна. Ингэснээр Боингийн шинэ загварын онгоцонд хориг тавьсан орнуудын тоо 40 орчим болжээ.

 

Аравдугаар сард Индонезийн Lion Air компанийн нисэх онгоц осолдсон бол өнгөрсөн Ням гарагт Ethiopian Airlines компанийн ижил загварын онгоц мөн осолдож, таван сар хүрэхгүй хугацаанд 340 гаруй хүний амь үрэгдээд байна.

Этиопын осолд Канадын 18 иргэний амь үрэгдсэн нь Кени улсын дараа хоёрт орох том хохирол байв. Канадын иргэдийн дотор нэг гэр бүлийн гурван үеийн 6 хүн байсан нь эмгэнэлтэй тохиолдол байлаа.

Эх сурвалж: Time, Quartz