ИНТЕРЬЕР: Унтлагын өрөөнд тав тух хамгийн чухал
Хүн амьдралынхаа 1/3-ыг унтаж өнгөрүүлдэг. Иймд энэхүү өрөөнд тав тух хамгийн чухал юм. Иймээс тав тухтай байлгахын тулд хэрхэн тохижуулж болох талаар танилцуулъя.
Унтлагын өрөөний хамгийн чухал тавилга бол мэдээж ор. Орчин үеийн интерьер дизайнд орыг хаана байрлуулахаас унтлагын өрөөний тохижилт хамаарна гэж үздэг. Орны толгойн хэсэг хоймор буюу хойд зүгт чиглэсэн байвал хамгийн зохимжтой. Ор нь заавал модон материалаар хийгдсэн байх албагүй ч модон байвал хэрэгтэй. Учир нь, хүмүүс бид гар утас, радио, зурагт гэх мэт соронзон долгионы орчинд байнга байдаг. Харин мод тэдгээрийг саармагжуулж зөөлрүүлдэг ач тустай билээ.
Нэгдүгээрт, торон хөшиг нь нарны гэрлийг чөлөөтэй нэвтрүүлснээр байгалийн гэрлийг ашиглах боломж олгодог. Харин нийлмэл эдээр хийсэн бараан өнгийн хөшиг нарны гэрлийг нэвтрүүлдэггүй тул өдрийн цагаар болон зуны өглөө ханатлаа унтахад тань туслах болно. Орны хоёр талд жижиг шүүгээ байрлуулж дээр нь ширээний гэрэл тавибал зохимжын зэрэгцээ цахилгаан хэмнэх даавхар ач холбогдолтойг хүмүүс тэр бүр мэддэггүй. Хэвтэж амарч байхдаа ном уншихын тулд өрөөний гэрлийг асаах шаардлагагүй. Тэгээд ч энэ нь хажуу дахь хүнээ хүндэлж буй нэг хэлбэр. Манайхан дүүжин тааз, гэрлийн бүрхүүл зэргийг тансаг чамин хэрэглээ мэт ойлгодог. Гэвч энэ нь цахилгаан хэмнэх мөн хэрэглээний тав тухтай байдлыг хангах ач холбогдолтой билээ.
Унтлагын өрөөний хана хурц, тод өнгөтэй байвал сэтгэл санаа тогтворгүй болгодог. Тиймээс энэ өрөөний ханын цаас бүдэг, хээ хуаргүй эсвэл хээ нь үл мэдэгдэм байвал зохилтой. Цайвар ногоон, шаргал өнгө хамгийн аятайхан сонголт ч байж мэднэ. Хананд байрлах уран зураг унтлагын өрөөний бас нэгэн имиж болдог. Орны бүтээлэг, дэр нь хөшигний өнгөтэй зохицож байхаар төлөвлөх нь зүйтэй. Тавиур, шүүгээн дээр байрлуулах сувинерийн зүйлс ч авсаархан, чамин байвал илүү донжтой мөн чамин харагддаг.
Ер нь унтлагын өрөө айл, өрх бүрийн тохь тухтай байдлыг илэрхийлэх нэгэн том хүчин зүйл байдаг. Иймээс унтлагын өрөөг өөрийн имиж, зан чанарын онцлогтойгоо тохируулж бүрдүүлэх нь хамгийн чухал юм.
Цэнхэр өнгийг анхаарал сулруулж түргэн унтахад нөлөөлдөг гэж үздэг бол шар өнгө амьдралын баяр баясгалан нэмдэг. Сэтгэл санаагаа өөдрөг байлгахад шар өнгө тустай ч эрч хүчтэй, цоглог энэ өнгөнд та үргэлж зохицож чадах эсэхээ бодолцож сонгох хэрэгтэй юм. Харин ногоон өнгө нь тогтвортой байдал болон сэргэж байгаа байгалийг илэрхийлдэг. Энэ өнгө тайвшрах анхаарал төвлөрөхөд хамгийн ихээр тусалдаг гэдгийг битгий мартаарай.
Эх сурвалж: Барилга.мн
