Хүйсийн тэгш эрх хангагдсан Азийн 10 улсын гуравдугаарт Монгол бичигдэж байна

О.Булган, iKon.mn

2018 оны 9 сарын 12

iKon.MN

Гэрэл зургийг: mpa.mn

Дэлхий дахин дахь хүйсийн ялгаатай байдал урьд өмнөхөөс багассан ч нийгмийн олон салбарын хүйсийн тэгш бус ялгаатай байдлыг бүрэн арилгаж, түүнээс урьдчилан сэргийлэхийн тулд улс орнууд илүү их хүчин чармайлт гаргах шаардлагатай байгааг Дэлхийн эдийн засгийн форум онцлоод байна.

Хүйсийн тэгш байдлыг хөхиүлэн дэмжиж, нийгэм, хөдөлмөрийн зах зээлд тэнцвэртэй байдлыг хадгалснаар эдийн засагт эергээр нөлөөлж, цаашдын ялгаатай байдлыг улам багасгаж, ирээдүйд бүрэн устгахад дэмжлэг болохыг Азийн орнууд ихээр ойлгон, улсдаа хэрэгжүүлэх болжээ.

Дэлхийн хүйсийн ялгаатай байдлын индекс анх 2006 онд гарж байв. Тэр үеэс хойш үзүүлэлт дээшилж, дэлхий даяар жендерийн тэгш бус байдлын талаарх ойлголт жил ирэх тусам нэмэгдэж байгааг жил тутам гаргадаг энэхүү үзүүлэлт харуулаад байна.

Тэгвэл Дэлхийн эдийн засгийн форум өнгөрсөн жил Азийн бүс нутаг дахь хүйсийн ялгаатай байдлыг хамгийн ихээр ойлгож, хүлээн авдаг улсын жагсаалтыг гаргасан юм. Тус бүс нутагт хийсэн хүйсийн ялгаатай байдлын үзүүлэлтийг гаргахын тулд улсуудын эдийн засаг, боловсрол, эрүүл мэнд болон улс төрийн оролцоот байдал, эмэгтэйчүүдэд олгогдож буй боломжуудыг тус тус харгалзан үзсэн байна.

1. Филиппин улс

Дэлхийн хүйсийн ялгаатай байдлын индексээр Азийн улс орнуудаас эхний 10-т бичигддэг ганц улс бол Филиппин юм.

Жижиг арал дээр оршдог тус улс нь өнгөрсөн жил эл индекст гурван байраар ухарсан үзүүлэлттэй гарсан ч ижил төстэй ажлын хөлсний хэмжээг тэнцүү болгосноороо нийт хүйсийн ялгаатай байдлыг 79 хувиар арилгажээ.

2. Бангладеш улс

Өмнөд Азид оршдог тус улс нь дэлхийд 47-р байрт бичигддэг бол Азийн улс орнуудаас хоёрдугаар байрт ордог байна. Бангладеш нь хүйсийн ялгаатай байдлыг нэлээд арилгасан гэж хэлж болно. Учир нь тус улсын төрийн өндөр, удирдах албан тушаал болон техникийн ажлын байранд хоёр хүйсийн өрсөлдөх боломж тэгш болсон байна.

3. Монгол Улс

Манай улс хүйсийн ялгаатай байдлын үзүүлэлтээрээ дэлхийд 53-т бичигддэг бол Азийн бүс нутагтаа гуравдугаар байрт оржээ. Өмнөх байранд орсон Бангладеш шиг Монголын улс төрийн болон төрийн албаны удирдах болон техникийн албан тушаалд хүйсийн тэнцвэртэй байдал хадгалагдаж буйг Дэлхийн эдийн засгийн форум онцолсон юм.

4. Бүгд Найрамдах Ардчилсан Лаос улс

Бүгд найрамдах ардчилсан Лаос улс нь нийт ажиллах хүчний ялгаатай байдлыг бүрэн халж, хүйсийн тэнцвэртэй байдал хоёр дахь жилдээ хэвээр хадгалагдсан улс юм.

5. Сингапур улс

Лаос улстай тун дөхөж, Сингапур улсын хөдөлмөрийн зах зээлд сүүлийн үед эмэгтэй ажилчдын тоо давамгайлах болсон ба техник технологийн салбарт ч мөн эмэгтэйчүүд ихээр хүч түрэх болжээ.

6. Бүгд Найрамдах Социалист Вьетнам улс

Вьетнам улсад мөн дээрх орнууд шиг улс төрийн шийдвэр гаргах, удирдах албан тушаалд эмэгтэйчүүдийн оролцоо нэмэгдэж, техник, нарийн мэргэжлийн ажлын байрууд дахь хүйсийн ялгаатай байдлыг бүрэн халжээ.

7.Тайланд улс

Тайланд улсад өндөр албан тушаалд эмэгтэйчүүдийн хүйсийн харьцаа илүү байгааг харуулсан байна. Вьетнам улс шиг техник, технологи, нарийн мэргэжлийн ажлын байруудад хүйсийн ялгааг бүрэн халж, их дээд сургуульд элсэж буй хүйсийн харьцаа тэгш болсныг онцолжээ.

8. Мьянмар улс

Дэлхийн хүйсийн ялгаатай байдлын үзүүлэлтэд шинээр орж ирсэн улсын хувьд ерөнхий болон дээд боловсролд элсэх хүйсийн ялгаатай байдлыг арилгаж чадсан байна.
Тайланд, Вьетнам улсуудын адил Мьянмарт нарийн мэргэжлийн ажлын байран дахь хүйсийн ялгаатай байдал үгүй болж, ажил хаялтын тоо багасаж, ажиллах хүчний тоотой тэнцүү хэмжээнд хүрсэн эерэг үзүүлэлт гарчээ.

9. Индонези улс

Индонези улсын хувьд бусад оронтой адил хүйсийн байдлаар дундаж цалингийн ялгаа багасаж, улс төр, удирдах албан тушаалд эмэгтэйчүүдийн оролцоо ихээр ажиглагдах болжээ. Гэвч нарийн мэргэжлийн болон техникийн салбарын ажлын байран дахь ялгаатай байдал нэмэгдсэн үзүүлэлттэй гарсан байна.

10. Камбожийн Вант улс

Камбожийн Улсын дээд шүүх, улс төрийн шийдвэр гаргах албан тушаалуудад ажиллах эмэгтэйчүүдийн тоо олширч, эмэгтэйчүүд их, дээд сургуульд элсэх боломжууд ч өмнөхөөсөө нэмэгджээ.

Эх сурвалж: weforum.org