Гэр хорооллын долоон байршилд жишиг гудамж, 16 байршилд спорт тоглоомын талбай байгуулахаар болжээ

Улаанбаатар хотын Захирагчийн ажлын албанаас нийслэлийн эдийн засаг, нийгмийн байдлыг хөгжүүлэх үндсэн чиглэлийн дагуу гэр хорооллын долоон байршилд жишиг гудамж, 16 байршилд спорт тоглоомын талбай байгуулахаар болжээ.

Тухайлбал, Баянзүрх, Хан-Уул, Чингэлтэй, Сонгинохайрхан, Багахангай, Налайх, Сүхбаатар дүүрэгт жишиг гудамж байгуулах аж. Энэ ажлын хүрээнд гэр хорооллын гудамж талбайд иж бүрэн гэрэлтүүлэг, зориулалтын явган хүний зам тавьж өгөх юм байна.

Мөн авто машины зорчих хэсэгт байгаа саадыг арилгаж, тэгшлэн орц гарцыг чөлөөлнө. Шаардлагатай хэсэгт ус зайлуулах хоолой байрлуулна.

Харин нийтийн эзэмшлийн талбайг хувийн зориулалтаар ашигласан тохиолдолд нийтийн эзэмшлийн зам талбайг чөлөөлнө.

Нэг дүүргийн гудамжны бүтээн байгуулалтыг 80 сая төгрөгт багтаан хийхээр зураг төслөө боловсруулсан байна.

Жишиг гудамж байгуулах ажлыг наймдугаар сараас өмнө дуусгахаар төлөвлөжээ.

Жишиг гудамж байгуулах 7 байршил:

1. Баянзүрх дүүргийн 24-р хороо
2. Сүхбаатар дүүргийн 15-р хороо
3. Чингэлтэй дүүргийн 17-р хороо
4. Сонгинохайрхан дүүргийн 4-р хороо
5. Хан-Уул дүүргийн 13-р хороо
6. Налайх дүүргийн долдугаар хороо
7. Багахангай дүүргийн 2-р хороо

 

Спорт тоглоомын талбай байгуулах 16 байршил:

1. Баянзүрх дүүргийн 14-р хороо
2. Баянзүрх дүүргийн 5-р хороо
3. Баянгол дүүргийн 13-р хороо
4. Баянгол дүүргийн 1-р хороо
5. Сүхбаатар дүүргийн 8-р хороо
6. Сүхбаатар дүүргийн 20-р хороо
7. Сүхбаатар дүүргийн 13-р хороо
8. Сонгино-хайрхан дүүргийн 11-р хороо
9. Сонгино-хайрхан дүүргийн 1-р хороо
10. Хан-Уул дүүргийн 10-р хороо
11. Хан-Уул дүүргийн 1-р хороо
12. Чингэлтэй дүүргийн долдугаар хороо
13. Чингэлтэй дүүргийн 12-р хороо
14. Багануур дүүргийн 1-5 дугаар байр
15. Налайх дүүргийн 2-р хороо
16. Бага-хангай дүүргийн 2-р хороо

Гэр хорооллын 9 байршил, орон сууцны 7 байршилд спорт тоглоомын талбай байгуулахаар зураг төслийг боловсруулсан байна. Тухайлбал, ахмад настны чийрэгжүүлэлтийн тоног төхөөрөмж, сагсан бөмбөгийн талбай, саравч, хүүхдийн гулгуур, элсний талбай байхаар төлөвлөжээ. Уг тоглоомын талбайг нийтдээ 1.5 тэрбум төгрөгөөр байгуулахаар болсон байна.