ОХУ-ын ерөнхий сайд Пёнчаны медальтнуудад BMW автомашин гардууллаа

ОХУ-ын ерөнхий сайд Дмитрий Медведев өчигдөр Пёнчаны Өвлийн Олимпийн наадамд медаль хүртсэн тамирчиддаа цоо шинэ BMW загварын автомашинуудыг гардуулжээ.

Алтан медальтнууд BMW X6, мөнгөн медальтнууд BMW X5, хүрэл медальтнууд BMW X4 автомашины түлхүүр хүлээн авсан байна. Уран гулгалтын Алина Загитова болон хоккейн эрэгтэй багийнхан нийт 26 ширхэг X6 машин авсан бол 13 тамирчин X5, долоон тамирчин X4 загварын төмөр хүлэгтэй болжээ.

Мөн өчигдөр ОХУ-ын ерөнхийлөгч Владимир Путин өвлийн олимпийн медальтнуудад “Найрамдлын одон”, “Эх орны төлөө” 1, 2 дугаар зэргийн төрийн одон гардуулсан юм.

ОХУ-ын үндэсний олимпийн хороо сэргээшийн хэргээр шийтгүүлж Пёнчаны олимпийн наадамд оролцох эрхгүй болсон тул тамирчид нь олимпийн далбаан дор оролцсон. Оросын тамирчид энэ удаа нийт 17 медаль зүүсний 2 нь алт, 6 мөнгө, 9 хүрэл медаль байжээ.

Эх сурвалж: ТАСС, Ruptly