Замын Цагдаагийн Газар бүтцийн өөрчлөлт хийжээ

Цагдаагийн Ерөнхий Газрын даргын тушаалаар Замын Цагдаагийн Газрыг /ЗЦГ/ Замын цагдаагийн алба болгон өргөтгөлөө. ЦЕГ-ын даргын зөвлөл өнгөрсөн Пүрэв гарагт хуралдаж, ЗЦГ-т бүтцийн өөрчлөлт хийсэн нь энэ юм.

Замын цагдаагийн албанд Улаанбаатар хотын замын цагдаагийн газар, дүүргүүдийн замын цагдаагийн хэлтсүүд багтана.

Дүүргүүд дэх замын цагдаагийн тасгийг хэлтэс болгон өргөтгөсөн байна.

Нийслэлийн замын хөдөлгөөний хяналтын газар, дүүргүүд дэх замын цагдаагийн хэлтэс Замын цагдаагийн албанд харьяалагдах бөгөөд Төлөвлөлт зохион байгуулалтын хэлтэс, Орон нутгийн хяналтын хэлтэс, Техник замын хяналтын хэлтэс, Урьдчилан сэргийлэх, олон нийттэй харилцах хэлтэс, Жижүүрийн шуурхай удирдлагын хэлтэс, Замын хөдөлгөөн зохицуулах гэрээт хэлтэс гэсэн бүрэлдэхүүнтэй үйл ажиллагаа явуулж байна гэж Замын Цагдаагийн Албанаас мэдээллээ.