Т.Дагвадорж: Манай холбооны энэ оны ажлын гүйцэтгэл 100 хувь биелсэн ч ₮3.8 тэрбумын өртэй байна

Гэрэл зургийг MPA агентлагийн онцгой зөвшөөрөлтэйгөөр ашиглав

Монголын Хөлбөмбөгийн Холбоо (МХХ)-ны Техникийн хэлтсээс холбооны үйл ажиллагаа, үүсээд байгаа нөхцөл байдалтай холбоотойгоор энэ сарын 16-нд шаардлага хүргүүлсэн. 

Уг шаардлагад “МХХ-ны 2023 оны ээлжит сонгуулиар сонгогдсон болох томилогдсон МХХ-ны ерөнхийлөгч, ерөнхий нарийн бичгийн даргын газрыг үйл ажиллагаа нь эхэлсэн цагаасаа доголдсон гацсан байдалтай явсаар өдийг хүрлээ.

Энэ хугацаанд олон төсөл, хөтөлбөр санхүүжилтгүй нэрийн дор гацаж, хөлбөмбөгийн холбоо болон энэ орчинд ажиллаж байгаа хүмүүс цалин хөлсөө авч чадахгүй, ажил амьдралаараа хохирсоор эцэст нь Монголын хөлбөмбөгийн спортын үйл ажиллагаа хэвийн явагдах боломжгүй болж, энэ бүгдэд хариуцлага хүлээх эзэнгүй, хариуцлага талаар ярихгүй байх үүргийг удирдлагаас өгсөөр байна" гээд Олон Улсын Хөлбөмбөгийн Холбоо, Азийн Хөлбөмбөгийн Холбооны санхүүжилтийн талаар дэлгэрэнгүй мэдээлэл өгөхийг хүссэн юм.

Шаардлагын дагуу өнөөдөр МХХ-ны Ерөнхий нарийн бичгийн дарга Т.Дагвадорж өнөөдөр Үндэсний мэдээллийн төвд сэтгүүлчдэд мэдээлэл өглөө.

Тэрбээр "Техникийн хэлтсийнхэн гаргасан шаардлагыг МХХ-ны Удирдах зөвлөл хүлээн авч, сэдвийн хүрээнд ярилцаад надад үүрэг өгсний дагуу өнөөдөр мэдээлэл хийж байна.

Монголын Хөлбөмбөгийн Холбоо нь Олон Улсын Хөлбөмбөгийн Холбоо (FIFA), Азийн Хөлбөмбөгийн Холбоо (AFC) болон Зүүн Азийн Хөлбөмбөгийн Холбоо (EAFC)-ны гишүүн гэж явдаг. Эдгээр холбоодын дүрэм журмын хүрээнд үйл ажиллагаа нь зохицуулагддаг.

МХХ 2024 оны төсөвт нийт ₮10.6 тэрбумыг орлого төвлөрүүлнэ гэж баталсан. 

Энэ орлогын гол эх үүсвэр нь FIFA-гийн санхүүжилт. Олон улсын холбооноос ₮4.3 тэрбумыг, Азийн хөлбөмбөгийн холбооноос ₮1.75 тэрбумыг төсөвлөсөн. 

 

Гэрэл зургийг MPA агентлагийн онцгой зөвшөөрөлтэйгөөр ашиглав

Манай холбоо хоёр эх үүсвэрээс санхүүждэг. Жишээлбэл Тайландын хөлбөмбөгийн холбоо гэхэд үйл ажиллагааныхаа зардлын 50 хувийг төрөөсөө авдаг. Харин манай холбоонд тийм дэмжлэг байдаггүй. 

Бидний төсөвлөсөн орлого бодит орлогоос зөрүүтэй. Тодруулбал FIFA-гаас ₮5.9 тэрбумыг авна гэж тооцсон ч бодит байдал дээр ₮4.5 тэрбумыг авсан. 

Мөн AFC-гээс ₮2.6 тэрбум гэж тооцсон ч ₮1.2 тэрбумыг авсан. 

Ингээд нийт зарлагын үр дүн нь ₮11.7 тэрбум бол орлого нь ₮8.4 тэрбум. Зөрүү болох ₮2.6 тэрбумыг зээлийн эх үүсвэрээс олсон. 

МХХ-ны санхүүжилтийн зарцуулалтын дэлгэрэнгүйг заавал танилцуулна гэж заагаагүй. 

Бидний ажлын гүйцэтгэл 100% биелсэн. Санхүүгийн зарцуулалт бүрэн гарсан ч ₮3.8 тэрбумын өртэй байна" гэж ярилаа.