ШӨХТГ: Орон сууцны даатгалын мөнгийг хууль бусаар авч байжээ

Шударга Өрсөлдөөн, Хэрэглэгчдийн Төлөө Газраас өнөөдөр хэвлэлийн бага хурал хийлээ. Өнөөдрийн хурлаар орон сууц өмчлөгч, эзэмшигчийн хариуцлагын даатгалын үйл ажиллагаанд хийсэн хяналт шалгалтын дүнг танилцуулсан юм. 

Хяналт шалгалтад орон сууц өмчлөгч, эзэмшигчийн хариуцлагын даатгалын чиглэлээр голлох үйл ажиллагаа эрхэлдэг “Ард даатгал" ХХК, "Улаанбаатар хотын даатгал” ХХК, “Хаан даатгал" ХХК-иуд хамрагдсан байна. 

Илэрсэн зөрчлүүд:

“Хаан даатгал” ХХК: Opoн сууц, нийтийн аж ахуйн удирдах газартай хамтран ажиллах гэрээ байгуулан түүний харъяа 16 хэрэглэгчдэд үйлчлэх төвөөр дамжуулан орон сууцны иж бүрэн даатгал /хөрөнгийн болон хариуцлагын/-ын үйлчилгээний хураамж /1500 төгрөг/-ийг хэрэглэгчийн өөрийнх нь зөвшөөрөлгүй, бичгээр байгуулсан гэрээгүйгээр бүлгээр хийгдэх даатгал нэрийдлээр оршин суугчдын байрны мөнгөн дээр шууд тооцон авч байжээ.

"Хаан даатгал" ХХК нь 2015 он хүртэл 44,854 өрхтэй бичгээр гэрээ байгуулж, баталгаажуулаагүй бөгөөд энэхүү үйл ажиллагааны улмаас 2013 онд 552.6 сая, 2014 онд 190.4 сая, 2015 оны байдлаар 269.1 сая төгрөг, нийт нэг тэрбум 12.1 сая төгрөгийн хууль бус орлого олж, иргэдэд хохирол учруулсан байна.

“Ард даатгал” ХХК: Сууц өмчлөгчдийн холбоодтой хамтран ажиллах гэрээ байгуулсан гэх байдлаар орон сууц өмчлөгч, эзэмшигчийн хариуцлагын даатгалын үйлчилгээний хураамж /1000 төгрөг/-ийг хэрэглэгчийн өөрийнх нь зөвшөөрөлгүй, бичгээр байгуулсан гэрээгүйгээр бүлгээр хийгдэх даатгал нэрийдлээр сууц өмчлөгчдийн холбооны төлбөрийн хамт шууд тооцон авч байсан зөрчил мөн илэрчээ.

Энэхүү үйл ажиллагааны улмаас 2013 онд 115.5 сая, 2014 оны байдлаар 117.5 сая, 2015 оны байдлаар 13.5 сая төгрөг, нийт 246.5 сая төгрөгийн хууль бус орлого олж, иргэдэд хохирол учруулсан байна.

“Улаанбаатар хотын даатгал” ХХК: Хяналт шалгалтад хамрагдсан даатгалын байгууллагуудын үйл ажиллагаанд даатгуулагчийн шилжилт хөдөлгөөн нэг бүрийг хийдэггүй, даатгалын хураамжийг давхардуулан авдаг, гэрээний сунгалт болон дүгнэх, цуцлах, өөрчлөлт оруулах нөхцлүүдийг хуульд заасан шаардлагын дагуу гэрээнд тусгадаггүй зэрэг зөрчлүүд илэрлээ.

Нийслэлийн Орон сууц, нийтийн аж ахуйн удирдах газар: “Хаан даатгал” ХХК- тай хамтран ажиллах гэрээ байгуулах замаар харъяа 16 Хэрэглэгчдэд үйлчлэх төвөөр дамжуулан орон сууцны иж бүрэн даатгал /хөрөнгийн болон хариуцлагын/-ын үйлчилгээний хураамж /1500 төгрөг/-ийг хэрэглэгчийн өөрийнх нь зөвшөөрөлгүй, бичгээр байгуулсан гэрээгүйгээр бүлгээр хийгдэх даатгал нэрийдлээр оршин суугчдын байрны төлбөрт шууд тооцон авах байдлаар хууль зөрчсөн үйл ажиллагаа хамтран хэрэгжүүлсэн байна.

Иймд ШӨХТГ-аас доор дурдсан арга хэмжээнүүдийг авч, хэрэгжүүлэхээр болжээ.

 

• Нийслэлийн орон сууц, нийтийн аж ахуйн удирдах газар болон “Хаан даатгал” ХХК-ийн байгуулсан хууль бус хамтран ажиллах гэрээг хүчингүй болгох.
   
• Зөрчлийг арилгуулах, хэрэглэгчдэд учруулсан хохирлыг барагдуулах улсын байцаагчийн дүгнэлт, албан шаардлагыг зөрчил гаргасан “Ард даатгал” ХХК, “Хаан даатгал” ХХК, Нийслэлийн орон сууц, нийтийн аж ахуйн удирдах газруудад хүргүүлсэн аж.
   
• Албан тушаалаа урвуулан ашиглаж, хэрэглэгчдийг хохироосон Нийслэлийн Орон сууц, нийтийн аж ахуйн удирдах газрын удирдлагад хариуцлага тооцуулах, иргэдэд учруулсан хохирлыг нөхөн төлүүлэх ажлыг зохион байгуулах саналыг дээд шатны байгууллага, албан тушаалтан болох Нийслэлийн Засаг дарга Э.Бат-Үүлд хүргүүлэв хэмээн ШӨХТГ-ын дарга Т.Аюурсайхан мэдэгдлээ.