Дархан-Уул аймгийн нэгдсэн эмнэлэг 50 сая төгрөгийн хөрөнгө оруулалт татжээ

Төсөв санхүүгийн хэмнэлтийн горимд шилжсэн энэ цаг үед “Сайн санаа” төслийг санаачилж, хүүхдийн эрүүл мэнд сайн сайхны төлөө олон бүтээлч ажлыг өрнүүлж байгаа Дархан-Уул аймгийн нэгдсэн эмнэлгийн хүүхдийн тасгийн хамт олон “Эх хүүхдийн эрүүл мэндийг дэмжих жил”-д бусдыгаа хошуучилж байна.

Тэд төсөв хүрэлцэхгүй байна гэж зовлон бэрхшээл тоочилгүй, өөрсдийн идэвхи санаачлагаар жижиг төслүүдийг бичиж, бусдад хандаж, ойлгуулснаар 2014 онд 50.0 сая төгрөгийн хөрөнгө оруулалтыг татаж чаджээ. Тодруулбал,

• Олон улсын жишигт нийцсэн Хүлээн авах хэсэг  \УИХ-ын гишүүн С.Ганбаатарын дэмжлэгээр “Сайнхүү ивээл” сан хүүхдийн хүлээн авах хэсэгт хүүхдийн онцлогт тохирсон зураг, өнгө бүхий орчин үеийн дизайнаар тохижилтыг хийж, яаралтай тусламж үзүүлэх, эрэмбэлэн ангилалыг хийх орчинг олон улсын стандартын дагуу байгуулж, 15 сая төгрөгийн хөрөнгө оруулалт хийсэн\
   
• Хөгжлийн бэрхшээлтэй хүүхдэд зориулсан өрөө  \Худалдаа хөгжлийн банкны 6 сая төгрөгийн хөрөнгө оруулалтаар “Хөгжлийн бэрхшээлтэй хүүхдэд зориулсан өрөө”-г тусгайлан тохижуулж, ор, ширээ, сандал, шүүгээ, хүүхдийн тоглоом, хөгжлийн бэрхшээлтэй хүүхдэд зориулсан ханын бариул, ариун цэврийн өрөөний суултуур зэргийг байршуулсан\
   
• Хүүхдийн тоглоомын өрөө \АУҮИС-ийн Дархан-Уул аймаг дахь Анагаахын сургуулийн 16 оюутан, “Эрдэнэс Плаза” ХХК-тай хамтран 3,5 сая төгрөгөөр “Тоглоомын өрөө”-г тохижуулсан\ 
   
• Хүүхдийн тоглоом сургалтын өрөө \Австрали улсад суралцдаг сурагч З.Анударь хүмүүст туслах, тамирчдад хөнгөн зууш хийж үйлчлэх, хог цэвэрлэх зэрэг ажил хийж цуглуулсан мөнгөөрөө 10 сая төгрөгийн хөрөнгө оруулалт хийж, “Хүүхдийн сургалт, тоглоомын өрөө”-г төрөл бүрийн тоглоом, тавилга, хэрэгсэл зэргээр тохижуулсан\ 
   
• Хүүхдийн тасгийн орны цагаан хэрэглэлийн бүрэн шинэчлэл \Хүүхдээ эмчлүүлж байсан “Бороо-Гоулд” ХХК-ийн ажилчин Б.Ганбаатар хүүхдийн тасгийн хамт олонд сайхан сэтгэлийн гараа сунгаж, 10 сая төгрөгийн хөрөнгө оруулалт хийснээр тус бүр 50 ширхэг шинэ хөнжил, гудас, дэр, цагаан хэрэглэлээр хангасан\

 Сайн санаа-Сайхан сэтгэлийн үр шимийг хүртэж, бүтээсэн үйлсээрээ бахархаж, улам ихийг хийхээр төлөвлөсөн Дархан-Уул аймгийн Нэгдсэн эмнэлгийн В.Шаравжамц эрхлэгчтэй хүүхдийн тасгийн хамт олны ажилд амжилт хүсье.