Б.Пүрэвдорж: Иргэд төрд зарсан хувьцаагаа буцаан худалдаж авах тухай тогтоолын төсөл санаачиллаа

Гэрэл зургийг MPA агентлагийн онцгой зөвшөөрөлтэйгөөр ашиглав

УИХ-ын дэд дарга Б.Пүрэвдорж "Иргэдээс худалдаж авсан "Эрдэнэс Тавантолгой" ХК-ийн хувьцааг буцаан эзэмшүүлэх тухай" УИХ-ын тогтоолын төсөл санаачилсан аж. 

Тус тогтоолын төслийг өргөн барьж байгаатай холбогдуулан Төрийн ордонд мэдээлэл өглөө. Тэрбээр "Засгийн газар ахмад настан, оюутны сургалтын төлбөр, эрүүл мэндийн даатгалын шимтгэл зэргээр "Эрдэнэс Тавантолгой" ХК-ийн 1,072 хувьцааг худалдаж авсан.

Тухайн үед энэхүү хувьцаа үхмэл байсан учраас иргэд төрдөө буцааж өгсөн. Гэтэл өнөөдөр "Эрдэнэс Тавантолгой" ХК идэвхтэй үйл ажиллагаа явуулсны үр дүнд ногдол ашиг олгож эхэллээ. 

УИХ-ын 2011 оны 57 дугаар тогтоолоор бол зөвхөн Засгийн газар иргэдийн хувьцааг нэрлэсэн үнээр худалдаж авах эрхтэй. Үүний дагуу эх орны хувь хишиг буюу 2012 онд гаргасан шийдвэрийн дагуу 322,767 ахмад настан, 615,701 иргэн эрүүл мэндийн даатгалын төлж, 1,721 хөгжлийн бэрхшээлтэй иргэн, 278 оюутан сургалтын төлбөртөө хувьцаагаа суутгасан. 

Сайн хувьцаа хөтөлбөр 2016 хувьцаа хэрэгжихэд 1,294,302 иргэний хувьцааг Засгийн газар худалдаж авсан. Сонгуульдаа санал авах зорилгоор иргэдийн хувьцааг худалдаж авсан. Мэдээлэлгүй байсан иргэд хувьцаа хэрэггүй байхаар нь Засгийн газартаа зарах хөдөлгөөн эхэлсэн. Гэтэл энэ хувьцаа амилсан учраас дээрх хүмүүсийн асуудлыг шийдэх чухал байна. 

Ингэснээр төсөвт ямар нэгэн дарамт учруулахгүй бөгөөд үр дүнд нь иргэн бүр ногдол ашиг авах нөхцөл бүрдэнэ. Нэг гэрт байгаа хүмүүс дөрвөн өөр хувьцааны ногдол ашиг авдаг бус адилхан авч, эх орныхоо баялгийг хүртэх боломж нээгдэнэ" гэв.