Ж.Чинбүрэн: Утааны талаар хэн гэх албан тушаалтан ямар шийдвэр гаргаж хэдэн их наяд төгрөг зарцуулсныг мэдээлнэ

Гэрэл зургийг MPA агентлагийн онцгой зөвшөөрөлтэйгөөр ашиглав

Утааны хяналтын сонсголыг “Агаарын бохирдлыг бууруулах хүрээнд утааны асуудлаарх бодлого, шийдвэрийн хэрэгжилтийн үр дүн шийдэл” сэдвээр 2025 оны хоёрдугаар сарын 3, 4-ний өдөр явуулахаар болсон. 

Үүнтэй холбогдуулан тус сонсголыг ахалж буй УИХ-ын гишүүн Ж.Чинбүрэн мэдээлэл өглөө. Тэрбээр "Ажлын хэсэг өчигдөр хуралдаж, сонсголын бэлтгэл ажлыг хангах, зохион байгуулах төлөвлөгөөг хэлэлцэж баталлаа. Сонсголд оролцох иргэн, аж ахуйн нэгж байгууллагыг 2025 оны нэгдүгээр сарын 23-н хүртэл бүртгэнэ.

Утааны асуудал гамшгийн хүрсэн учраас иргэд олон нийт ерөнхий хяналтын сонсгол явуулахыг шаардаж, УИХ-д хандсан. Иймд ажлын хэсэг богино хугацаанд үр дүнтэй ажиллаж шийдэл гаргахын тулд дөрвөн удаагийн дэд хэлэлцүүлэг зохион байгуулахаар сэдэв гаргасан. 

Утаа хүний амьд явах эрх эрүүл мэндэд хэрхэн нөлөөлж байгаа нотолгоо, зуух түлшний стандарт, хяналт хариуцлага, эрх зүйн орчин санхүүжүүлэлт зарцуулалтыг олон нийтэд ил болгох гэсэн дөрвөн сэдвийн хүрээнд дэд хэлэлцүүлэг зохионо. 

Төрөөс утаатай тэмцэх талаар авч хэрэгжүүлсэн бодлого, шийдвэрийн хэрэгжилт, санхүүжүүлэлтийн зарцуулалтын талаар тусгай хэлэлцүүлэг явуулна. Хүний амьд явах эрх, эрүүл мэндээ хамгаалуулах эрх зөрчигдсөн талаар мэргэжлийн зургаан шинжээч томилох саналаа УИХ-ын тамгын газар руу илгээсэн. 

Утааны сонсгол явуулснаар таван үр дүн гарна. Нэгд утаа, агаарын бохирдол уушги амьсгалах бүрдээ хордсоор байгаа нь үнэн. Улс орон даяар түүхий нүүрс түлэхийг халах шийдэл гаргах, сайжруулсан нэртэй боловч муужруулсан түлш гэдгийг шинжлэх ухааны хөдөлшгүй баримтаар нотлохыг зорьж байна.

Хоёрт утааг арилгах 1,500 гаруй шийдэл, хувилбар байдаг. Хамгийн үр дүнтэй орц гарцыг эрдэмтэн судлаачийн дүгнэлтэд суурилуулж санал болгуулахаар зорьж байгаа. 

Гуравт ямар албан тушаалтан, хэдэн их наяд төгрөгийг юунд зарцуулсан, хэзээ яагаад ямар шийдвэр гаргасныг олон нийтэд мэдээлнэ.

Дөрөвт агаарын бохирдлын үндсэн шалтгааны нэг болсон автомашины утааны сөрөг нөлөө, баримт мэдээллийг ил болгож, түгжрэлтэй тэмцэх бодлого шийдлийн талаар ярилцана. 

Тавдугаарт хэлэлцүүлгийн явцад илрэх зөрчлүүдийг хэрхэн арилгах, санал шийдэл бүхий УИХ-ын тогтоолын төслийг Байнгын хороо, УИХ-д өргөн барьж, батлуулна" гэв.