Таван иргэн хар тамхины хэргээр цаазын ял сонсчээ
Энэ оны эхний гурван сарын байдлаар манай улсын хэмжээнд хар тамхи мансууруулах, сэтгэцэд нөлөөлөх бодис, түүхий эдийн хууль бус үйлдэлтэй холбоотой 133 гэмт хэрэг, 365 үйлдэлд 460 хүн холбогдон шалгагджээ.
2010 оноос хойш бүртгэгдсэн гэмт хэргийн тоо 2002-2009 оны гэмт хэргийн дундажтай харьцуулж үзэхэд 7.6 дахин, холбогдогч нь 5.3 дахин өссөн үзүүлэлттэй гарсан байна.
2002-2009 онд нийт 63 гэмт хэрэг, 68 үйлдэлд 184 хүн холбогдон шалгагдаж байсан бол 2009 оноос хойш энэ төрлийн гэмт хэрэг, түүнд холбогдогчдын тоо нэлээд өсчээ.
Монгол Улсын 66 иргэн хар тамхи мансууруулах бодистой холбоотой хэргээр гадаадын улс оронд шалгагдаж, хэрэг нь шийдвэрлэгдэн, шийтгэгдсэн байдаг аж.
Тухайлбал Унгар болон Казахстан улсад тус бүр гурав, ОХУ-д зургаа, Словак, Бангладеш, Филиппин, Грек, Болгар улсад тус бүр нэг, Малайзад тав, БНХАУ-д 44 иргэн байна.
Үүнээс БНХАУ-д байгаа таван иргэнд цаазаар авах ял оноосон бол Малайзад шалгагдаж байгаа гурван иргэн мөн цаазын ялаар шийтгүүлэх магадлалтай гэж Мөрдөн байцаах газрын Зохион байгуулалттай гэмт хэрэг мөрдөх хэлтсийн дарга дэд хурандаа Б.Батзориг хэлж байв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
