Липницкая гавьяат тамирчин болов
Хар тэнгисийн эрэгт болж буй олимпод Оросын Екатеринбург хотоос гаралтай 15 настай уран гулгагч охин Юлия Липницкая олны анхаарлын төвд байна.
Наснаасаа илүү хэрсүү охин ОХУ-ын уран гулгагчид багийн төрөлд аварга болоход чухал нөлөө үзүүлсэн гэхэд хилсдэхгүй. Түүний багийн төрөлд гүйцэтгэсэн гайхалтай үзүүлбэрийг өдгөө дэлхийн өнцөг булан бүрт хамгийн олон хүн үзээд байгаа.
Тэгвэл ОХУ-ын Ерөнхийлөгч Владимир Путин Липницкаяд гавьяат тамирчин цол олгохоор шийдвэрлэжээ.
Гэхдээ энэ нь тус улсын түүхэнд хамгийн залуудаа гавьяат болсон тохиолдол биш. Түүнээс өмнө уран сайхны гимнастикийн хэд хэдэн тамирчин 15-аас дээш насандаа гавьяат болж байв.
Түүнд гавьяат олгохоор болсонд зарим хүн шүүмжлэлтэй хандаж байгаа бол хэсэг нь ганцаарчилсан төрөлд түрүүлэхэд урам зориг өгсөн явдал хэмээн үзэж байна.
