Украйн улсын Ерөнхий сайд асан Юлия Тимошенко шүүхэд хандан түүнийг хорьж байгаа шоронгийн нөхцлийг хөнгөвчлөхийг шаардсан байна.
Ю.Тимошенко эхлээд Украйны засан хүмүүжүүлэх албанд хүсэлтээ тавьсан ч татгалзсан аж. Тиймээс шүүхэд ханджээ. Ю.Тимошенко шаардлага бичихдээ өөрийг нь дуудахгүйгээр хэлэлцэхийг зөвшөөрсөн талаар шүүхээс мэдэгдсэн юм. Харьков хотын Коминтерн дүүргийн шүүх түүний шаардлагыг хэлэлцээд, улсын шүүгч В.Тугайбей “Прокурорын газраас засан хүмүүжүүлэх албаны хүсэлтэд татгалзсаныг хуулийн дагуух үйлдэл гэж үзэж байна. Бид уг шийдвэрийг өөрчлөх үндэслэл байхгүй гэж бодож байна” гэж хэлжээ.
Харин Ю.Тимошенкогийн өмгөөлөгч Украйны Эрүүгийн хуулиар бол Ерөнхий сайд асныг хорих дэглэмийг хөнгөвчлөх, эргэлтээр очсон хүмүүстэй богино хугацаанд уулзах эрх олгох, биеэ эмчлүүлэхээр эмнэлэгт хэвтэх болон шоронгоос холгүй орших хот суурин газарт очих зөвшөөрөл олгох бололцоотой гэдгийг хэлсэн байна.
Түүнчлэн Украйны сөрөг хүчний Батькивщина намын хэвлэлийн албанаас мэдэгдэхдээ Ю.Тимошенко ялынхаа гуравны нэгийг эдэлсэн учраас шоронгийн нөхцлийг хөнгөвчлөх хуулийн үндэслэлтэйг онцолжээ.