Аргентины хөлбөмбөгийн од Лионель Месси үндэсний шигшээ багаасaa зодог тайлж байгааг зарлалаа

Гэрэл зургийг Reuters агентлагийн онцгой зөвшөөрөлтэйгөөр ашиглав

Аргентины хөлбөмбөгийн од Лионель Месси үндэсний шигшээ багаасаа зодог тайлж байгааг өчигдөр зарлажээ.

Өөрөөр хэлбэл тэр эх орноо төлөөлөн олон улсын тэмцээнүүдэд дахин оролцохгүй болж байна.

2022 оны Катарын дэлхийн аварга шалгаруулах тэмцээнд (ДАШТ) үндэсний шигшээ багаа ахлан оролцоод түрүүлж байсан 39 настай Месси олон улсын нийт 207 тоглолтод 125 гоол оруулсан амжилтаар Аргентины бүх цаг үеийн хамгийн мэргэн бууч, хамгийн олон тэмцээнд оролцсон тоглогч болжээ.

Месси мэдэгдэлдээ Аргентины үндэсний шигшээ багт бүх зүйлээ зориулсан, харин одоо “өгөх зүйл үлдсэнгүй” гэж хэлсэн байна.

“Цаг хугацаа өнгөрч, амьдралын нэг хуудас эргэж байгаа нь надад маш хэцүү байна. Би үндэсний шигшээ багийн нэг хэсэг байхдаа үргэлж дуртай байсан. Би бүхнээ зориулсан, надад өгөх зүйл үлдсэнгүй. Нөгөө талаар миний ард боломжоо хүртэх ёстой үнэхээр гайхалтай залуу тоглогчид гарч ирж байна” гэж Месси мэдэгджээ.

Өнгөрсөн сарын эхээр түүний аав Хорхе удаан өвдсөний эцэст 68 насандаа таалал төгссөн. Энэ үеэр Месси цаашдаа хөл бөмбөг тоглох эсэх талаараа эргэцүүлэн бодож байгааг хэлж байв.

Хорхе нь Мессийг хүүхэд байхаас эхлэн сургаж, дасгалжуулж, хөлбөмбөгийн клубүүдэд зуучлагчаар ажиллаж байсан хүн юм.

Месси зодог тайлах мэдэгдлээ долдугаар сарын 21-ний өдөр буюу өнгөрсөн ДАШТ-ий шигшээ тоглолтод Аргентины баг Испанийн багт хожигдсоноос хойш хоёр хоногийн дараа бичсэн юм байна.

 

“Миний аавд тохиолдсон зүйлийн дараа би өнөөдөр өмнөхөөсөө ч илүү итгэлтэй байна” гэж тэр гаргасан шийдвэрээ Инстаграм хуудсаараа тайлбарлажээ.

Интер Майами багтай байгуулсан гэрээ нь 2028 оны улирлын төгсгөл хүртэл үргэлжлэх тул Мессигийн хөлбөмбөгийн замнал клубийн түвшинд үргэлжлэх юм байна.

Түүний олон улсын замнал хүндхэн эхэлж байсан түүхтэй.

2005 онд Месси анх удаагаа Аргентины шигшээ багийн бүрэлдэхүүнд Унгарын эсрэг хийсэн нөхөрсөг тоглолтод оролцож байв.

Гэвч сэлгээний суудлаас тоглолтын 63 дахь минутад талбайд гарсан Месси ердөө нэг минут хүрэхгүй хугацааны дотор улаан хуудас аваад талбайгаас хөөгдөж байжээ.

Месси хөгжөөн дэмжигчдэдээ “Сүүлийн 20 жилийн хугацаанд үзүүлсэн бүх хайрын тань төлөө баярлалаа. Та нарын дуу хоолойг талбай дээрээс сонсохыг маш их санаж үгүйлэх болно. Одоо би та нарын нэг болж, үзэгчийн суудлаас үргэлж дэмжиж байх болно. Бидний мөрөөдөж байсан мөчүүдийг багийнхантайгаа хамт та бүхэнд бэлэглэсэндээ би их бахархаж, сэтгэл амар буцаж байна. Үүнийг та бүхэнтэй хамт мэдэрсэн нь үнэхээр гайхалтай байсан. Би та нартаа хайртай” гэж бичсэн байна.

Эх сурвалж: BBC