Netflix-ийн Physical Asia реалити шоуд оролцох олимп, дэлхийн медальт тамирчид

Дэлхийд алдартай "Netflix" компани болон Өмнөд Солонгосын MBC сувгийн продюсер Жан Хо Ги нарын хамтын бүтээл болох "Physical 100" шоуны дараагийн анги "Physical Asia" нэвтрүүлэгт Монголын баг оролцож байгаа билээ.

Монголоос гадна Ази тивийг төлөөлж Австрали, Филиппин, Тайланд, Өмнөд Солонгос, Монгол, Япон, Индонез болон Турк Улсаас баг оролцож байгааг мэдэгдсэн.

Саяхан тус нэвтрүүлгийг зохион байгуулагчид оролцогчдын нэрийг зарласан юм.

Монголын багт

• Монгол Улсын арслан Б.Орхонбаяр,
• холимог тулаанч Б.Энх-Оргил,
• 3х3 сагсан бөмбөгийн шигшээ багийн тамирчин Э.Дөлгөөн,
• волейболын үндэсний шигшээ багийн тамирчин Г.Хандсүрэн,
• жүдогийн үндэсний шигшээ багийн тамирчин А.Адъяасүрэн, 
• Монгол Улсын гавьяат жүжигчин, уран нугараач Э.Лхагва-Очир нар оролцоно.

Тэгвэл бусад багт олимп, дэлхийд амжилт гаргаж явсан олон алдартан бий. Тэдгээрээс танилцуулъя.

БНСУ

 

Тус нэвтрүүлгийг санаачлагч БНСУ-ын багт өвлийн олимпын аварга, Дэлхийн Аварга Шалгаруулах Тэмцээн (ДАШТ)-ий мөнгө, хүрэл медальт Ю Сүн Бин бий. Тэрбээр нутагтаа зохион байгуулагдсан Пёнчаны цагаан олимпод скелетоны төрлөөр аваргалж байв. 

Төмөр хүн хочтой гуулин эр өдгөө 31 настай. Тамирчны замналдаа албан ёсоор цэг тавиагүй ч сүүлийн үед урлагийн салбарт хүч үзэх болжээ. 

Netflix-ийн Physical 100 шоуд 2023 онд оролцсон бол 2026 оны дундуур олны хүртээл болох "The House of Ghosts" кинонд дүр бүтээж байна.

ЯПОН

Японы багт хамгийн олон олимп, дэлхийн медальтнууд багтжээ. Тодруулбал усанд сэлэлтийн тамирчин Кацүми Накамүра Ханжоуд болсон 2018 оны ДАШТ-ээс 4х100 метрийн буухиа уралдаанд хүрэл медаль хүртэж байв.

Түүнээс гадна монголчуудын сайн танил жүдоч Соичи Хашимото бий. Өнгөрсөн жилийн олимпоос хүрэл медаль хүртсэн С.Хашимото ДАШТ-ээс алт, хошой мөнгө, хүрэл медаль хүртсэн юм.

Мөн чөлөөт бөхийн төрлөөр олимпын хүрэл, ДАШТ-ий хошой алт, нэг хүрэлтэй Нонока Озаки нэвтрүүлэгт хүч сорино.

ТУРК

Токиогийн олимпоос хүрэл, ДАШТ-ээс нэг алт, хошой хүрэл медаль хүртсэн каратэгийн мастер Али Софуоглу улсаа төлөөлөн телевизийн шоуд оролцох бол эмэгтэйчүүдээс чөлөөт бөхийн төрлөөр олимпын хүрэл, ДАШТ-ээс хоёр алт, нэг мөнгөн медаль зүүсэн Ясемин Адар хүч сорих юм.