Б.Баярсайхан: Унаач хүүхдийн хамгаалалтын хувцас, гутал нь томдсон, нойтон оймс өмсүүлсэн зэрэг зөрчил илэрч байна
Хүй долоо худагт улсын баяр наадмын хурдан морьдын уралдааны унаач хүүхдүүдийн аюулгүй байдлыг хэрхэн хангуулж байгаа талаар Хүүхэд, гэр бүлийн хөгжил, хамгааллын ерөнхий газраас мэдээлэл өглөө.
Тус газрын дарга Б.Баярсайхан "Хүй долоо худагт хурдан морь унах хүүхдүүдийн нас, эцэг эх, асран хамгаалагчийн гэрээ болон зөвшөөрөл, бүртгэл, эрүүл мэндийн шинжилгээнд хамрагдсан байдлыг шалгахаас гадна хамгаалах хувцас стандартад нийцсэн эсэхийг шалгаж байна.
Унаач хүүхдийн өмдөн дотор том сур хийх, хэт урт ташуур бариулах, 8 нас хүрээгүй хүүхдийг оруулах, хамгаалалтын хувцас, гутал нь томдсон, нойтон оймс өмсүүлсэн зэрэг зөрчлүүд илэрч байна. Эцэг эх, асран хамгаалагч нартай нь уулзаж, шаардлагыг хангуулж, оруулж байна. Харин хамгаалах хэрэгсэлгүй хүүхдийг уралдаанд оруулахгүй. Ярилцлагын үед 8 нас хүрсэн гэх боловч сургууль завсардсан хүүхдүүд байгаа нь харамсалтай.
Нэг ч хүүхдийг гэмтээхгүй, сэтгэл төвшин дэлгэр сайхан наадах зорилготой энэхүү шалгалтыг хийж байгаа юм.
Анх удаа уралдааны морь унаж гэж байгаа айдастай хүүхдүүд байна. Айдастай хүүхдүүдийг уралдуулахгүй байх, тайвшруулах, сэтгэлзүйн зөвлөгөөг өгч байна. Сэтгэлзүйч ажиллаж байгаа юм" гэв.
Мөн унаач хүүхдийн хөлийн шилбийг скочодсон, дуулга дотор станц байршуулсан зөрчил илэрчээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
21 СЭТГЭГДЭЛТЭЙ
|
