5 жилийн урамшууллыг 191 алба хаагчид олгоход 25 тэрбум төгрөг шаардлагатай гэдэг тооцоолол гарчээ

Гэрэл зургийг MPA агентлагийн онцгой зөвшөөрөлтэйгөөр ашиглав

Хууль зүйн салбарын 2026 оны төсвийн төсөлд олон нийтээс санал авах танхимын хэлэлцүүлэг өнөөдөр Хууль зүй, дотоод хэргийн яаманд боллоо. Тус салбарт Цагдаагийн ерөнхий газар, Хил хамгаалах ерөнхий газар, Шүүхийн шийдвэр гүйцэтгэх ерөнхий газар, Улсын бүртгэлийн ерөнхий газар, Архивын ерөнхий газар, Шүүх шинжилгээний ерөнхий газар, Гадаадын иргэн харьяатын газар, Дотоод хэргийн их сургууль зэрэг 12 байгууллага хамрагддаг.

Хэлэлцүүлгийн үеэр тус салбараас ирэх онд тэтгэвэрт гарах алба хаагчдад олгох мөнгөн тэтгэмжийн талаар Төрийн нарийн бичгийн дарга Н.Мягмар танилцуулав. Тэрбээр:

• Төрийн албаны тухай хуулийн 46.2.2, 46.2.3-т заасан нөхцөлөөр тэтгэвэр тогтоолгох 85 алба хаагчид 2.8 тэрбум төгрөг,
• Цэргийн алба хаагчийн тэтгэвэр, тэтгэмжийн тухай хуулийн 19.1, 19.2-т заасан нөхцөлөөр тэтгэвэр тогтоолгох 1,421 алба хаагчид 124.8 тэрбум төгрөг,
• Хөдөлмөрийн хуульд заасан нөхцөлөөр тэтгэвэр тогтоолгох 1 алба хаагчид 17.9 сая төгрөгийн тэтгэмж тус тус олгохоор тооцоолсон. Нийт 1,507 алба хаагчид нийт 127.6 тэрбум төгрөгийн тэтгэмж олгох тухай асуудлыг ирэх оны төсөвт тусгасан" гэв. 

 

Гэрэл зургийг MPA агентлагийн онцгой зөвшөөрөлтэйгөөр ашиглав

Мөн төрөөс үзүүлэх дэмжлэг буюу 5 жилийн урамшууллын тухайд, нийт 191 албан хаагчид 25 тэрбум төгрөг олгохоор тооцжээ.

Түүнчлэн хууль зүйн салбарт ирэх онд нийт 2,370 орон тоо нэмэх шаардлагатай байгаа бөгөөд үүнийг дагаад төсөв 104.3 тэрбум төгрөгөөр нэмэгдэх тооцоолол гарсан байна. Шаардлагатай орон тоог салбар бүрээр авч үзвэл, Хууль зүйн үндэсний хүрээлэнд 8, Дотоод хэргийн их сургуульд 79, Шүүхийн шийдвэр гүйцэтгэх ерөнхий газарт 823, Хил хамгаалах ерөнхий газарт 592, Цагдаагийн ерөнхий газарт 768 орон тоо шаардлагатай байгаа аж.