Гэрэл зургийг MPA агентлагийн онцгой зөвшөөрөлтэйгөөр ашиглав

Үндэсний мэдээллийн МОНЦАМЭ агентлагт үүсээд байгаа нөхцөл байдалтай холбогдуулж тус байгууллагын хамт олноос өнөөдөр мэдээлэл хийж байна. 

Тэд дараах байр сууриа илэрхийллээ. 

"Олон даргын нүүр үзсэн ч удирдлагынхаа арга барилд сэтгэл дундуур байна гээд өргөх бичиг бариад явсан түүх байхгүй" 

Мэдээлэл технологийн албаны дарга С.Баярсайхан "Тусгаар тогтносон улс болгон албан ёсны мэдээллийн агентлагуудтай байдаг. Улс орнуудын мэдээллийн агентлагууд өөр хоорондоо албан ёсны гэрээ хэлэлцээр хийж түүнийхээ дагуу мэдээллээ солилцож ажилладаг.

Өнгөрсөн хугацаанд олон даргын нүүр үзсэн ч удирдлагынхаа арга барилд сэтгэл дундуур байна гээд өргөх бичиг бариад явсан түүх байхгүй. Манай агентлагийн ихэнх нь залуучууд байдаг. Цахим орчноор шуугиад байгаа шиг хуучны хүмүүс нь нийлээд турхираад байгаа юм байхгүй. Эрх мэдлийн төлөөх зөрчил ч биш юм. Ажилчдын 84 хувь нь сайн дураараа нэгдэж агентлагийнхаа эрх ашгийг хамгаалахын тулд өргөх бичиг барьсан" гэв. 

"Энэ хүний хууль ёсыг дээдэлдэггүй, дээрэнгүй ааш авираас болж 51 хүн ажлаас гарахад хүрсэн тухай л асуудал юм"

МОНЦАМЭ агентлагаас монгол бичгээр эрхлэн гаргадаг "Хүмүүн бичиг" сонины хариуцлагатай редактор Б.Элбэгзаяа "МОНЦАМЭ агентлагийг хоёр гаруй жил удирдаж байгаа Э.Содонтогос даргын ёс зүйгүй асуудал, зан суртахууны доголдол, дээрэнгүй ааш авир хэрээс хэтэрсэн тул мэдэгдэл хүргүүлсэн юм. 

Э.Содонтогос дарга агентлагийн орлогч дарга Т.Энхтуяаг ажилчдад архи өгч, албан тушаал амлан гарын үсэг цуглуулсан гэж гүтгэж байна. 

Монголын тэргүүн зэргийн дуун хөрвүүлэгч сэхээтэн хүний эрдэм мэдлэгийг бид хүндэтгэж ажилласан. Үүнийг манай агентлагийн хамт олон ганц удаа ч үгүйсгээгүй. Гагцхүү энэ хүний хууль ёсыг дээдэлдэггүй, дээрэнгүй ааш авираас болж 51 хүн ажлаас гарахад хүрсэн тухай л асуудал юм. Энэ байгууллагын дарга байсан хүн эргээд байгууллагаа элдвээр гүжирдэн гүтгэж, гутаан доромжилж байгаад бид харамсаж байна. 

Би орон нутагт монгол бичгийн тогтмол хэвлэл болох "Хүмүүн бичиг" сониныхоо ажлаар яваад ирсэн. Сониноо борлуулсан. Аймгийн удирдлагуудтай уулзаж сонины захиалга авах тухай хэлэлцсэн. Гэтэл миний хоёр өдрийн цалинг хассан тохиолдол ч гарч байв" гэв. 

 

Гэрэл зургийг MPA агентлагийн онцгой зөвшөөрөлтэйгөөр ашиглав

"Олон жилийн туршлагатай орчуулагчид батлагдаагүй сорилтод оролцохоос татгалзсаны төлөө хоёр сарын турш ур чадварын нэмэгдлээ аваагүй"

МОНЦАМЭ агентлагийн Хятад хэл дээрх "Монголын мэдээ" сониныг ахалж гаргадаг сэтгүүлч Б.Мөнхтуул "Э.Содонтогос Хятад мэдээллийг сониндоо тавьсан гэж шүүмжилсэн. Манай агентлаг Синьхуа агентлагтай хийсэн гэрээгээр тус агентлагийн мэдээллийг ашиглах зөвшөөрөлтэй байдаг. Гэрээний дагуу сониныхоо нэг нүүрэн дээр Синьхуа агентлагийн сурвалжлагч нарын Монголын тухай бичсэн мэдээллийг тавьдаг юм. 

Түүнчлэн МОНЦАМЭ агентлагийн олон жилийн туршлагатай орчуулагч нарыг  "Орчуулагч, хэлмэрчийн үнэлгээний төв" гэх ТББ-ын сорилтод орохыг шаардсан. Бид батлагдаагүй сорилтод оролцохоос татгалзсан. Шалгалтад ороогүйн төлөө миний болон хоёр орчуулагчийн ур чадварын нэмэгдлийг хоёр сарын турш хасах тушаал гаргасан байдаг" гэв. 

"Ажлаас чөлөөлөгдсөн 51 хүний тоонд тэтгэвэрт гарсан, жирэмсний амралтаа авсан хүмүүс ороогүй"

Захиргаа, Хүний нөөцийн ахлах мэргэжилтэн Д.Отгонжаргал "Э.Содонтогос дарга манай агентлагт томилогдсон цагаасаа буюу 2022 оны арваннэгдүгээр сараас өдийг хүртэл нийт 51 ажилтныг ажлаас нь чөлөөлсөн. Энэ тоонд тэтгэвэртээ гарсан, жирэмсний амралтаа авсан хүмүүс ороогүй юм. 

Ажлаас чөлөөлөгдсөн хүмүүсийн дийлэнх нь өргөдлөө өгөөд гарахаас өөр аргагүй нөхцөл байдалд орж, даргын дарамт шахалтаас болж гарсан. Дарга томилогдож ирсэн цагаас дөрвөн даргын туслах солигдсон. Даргын туслахууд ажлынхаа тагтан дээр гарч уйлдаг нөхцөл байдал ч байсан. 
Ажилтнууд өөдөөс нь тайлбар тавих гэхээр няцааж, доромжлон хашхирах зэрэг бүдүүлэг үйлдэл маш их гаргадаг. Түүнчлэн дарга Хөдөлмөрийн тухай хууль болон Ерөнхийлөгч Тамгын газраас ирсэн захирамжийг хэрэгжүүлж ажилладаггүй. Манай уран бүтээлчид илүү цагаар ажилласан хөлс болон, бүх нийтийн амралтын өдрөөр ажилласан мөнгөө ч авдаггүй. 
Ур чадварын нэмэгдэл даргын өнгө үзэмжээр л нэмэгдэж хасагддаг. Манай байгууллагад сахилгын шийтгэл, мэдэгдэх хуудас аваагүй ажилтан ховор байна" гэв.