Илон Маск бизнестээ "супер" анхаарал тавьж, долоо хоногийн турш 24 цагаар ажиллаж эхлэхээ амлав

АНУ-ын ерөнхийлөгч Дональд Трампын засгийн газрын төсвийг бууруулах хүчин чармайлтын гол нүүр царай дэлхийн тэргүүн баян Илон Маск байсан билээ.

Үүнийхээ төлөө тэр нэр хүндээ алдаж, эрхэлдэг бизнесүүд нь асуудалтай тулгарч, хувийн хөрөнгийн хэмжээ нь буураад байгаа.

Бямба гарагт түүний эзэмшдэг X сошиал платформын ажиллагаа дэлхий даяар тасалдсан юм.

Үүний дараа Илон Маск бизнестээ “супер” анхаарал тавьж ажиллахаа амлажээ.

“Ажилдаа долоо хоногийн 24 цагийг зарцуулж, хурлын өрөө, серверийн өрөө, үйлдвэрийн өрөөнд хонодог болно. Бид чухал технологиудыг нэвтрүүлэх гэж байгаа тул X, xAI болон ирэх долоо хоногт хөөргөх Starship хөлөгтөө би супер анхаарал тавьж ажиллах болно” гэж тэр өчигдөр сошиал хуудсандаа бичсэн байна.

Өнгөрсөн сард тэр Тесла компанийн санхүүгийн тайланг хөрөнгө оруулагчдад танилцуулах үеэрээ бас Трампын засаг захиргааны ажилд зарцуулах цагаа эрс багасгаж, бизнестээ анхаарах тухай ярьж байв.

Мягмар гарагт Катарын эдийн засгийн чуулганд видео холбоогоор оролцохдоо Илон Маск цаашдаа улс төрийн үйл ажиллагаанд зарцуулах мөнгөө эрс багасгах төлөвлөгөөтэй байгаагаа мэдэгдсэн юм.

“Хэрвээ шалтгаантай гэж үзвэл би цаашдаа улс төрд мөнгө зарцуулах болно. Одоогоор ийм шалтгаан харагдахгүй байна” гэж тэр хэлж байжээ.

Өнгөрсөн оны АНУ-ын ерөнхийлөгчийн сонгуульд Бүгд Найрамдах намын нэр дэвшигч Дональд Трампыг ялуулахын тулд Маск доод тал нь $250 саяыг зарцуулсан гэдэг. Сүүлд бас Америкийн улс төрийн өрсөлдөөнд чухал ач холбогдолтой Висконсин мужийн дээд шүүхийн сонгуульд консерватив нэр дэвшигчийг ялуулахын тулд $20 гаруй саяыг зарцуулсан ч үр дүнд хүрээгүй нь түүний хувьд хүнд цохилт болсон юм.

Эх сурвалж: Business Insider