Онцгой байдлын албанд ашиглах нисдэг тэргээр сайд, дарга нарыг зөөсөн эсэхэд УОК-ын нарийн бичгийн дарга ХАРИУЛЖ ЧАДСАНГҮЙ

Гэрэл зургийг MPA агентлагийн онцгой зөвшөөрөлтэйгөөр ашиглав

Ой, хээрийн түймрийн нөхцөл байдалтай холбогдуулан Улсын Онцгой Комисс, Онцгой Байдлын Ерөнхий Газраас хэвлэлийн хурал зохион байгууллаа 

Сэтгүүлч: Өчигдөр албанд ашиглах нисдэг тэргээр Булган руу сайд, дарга нарыг тээвэрлээд үүрэг гүйцэтгэж явсан гэх мэдээлэл байна. Үүнд тайлбар өгнө үү?

Хурандаа Т.Баярхүү: Тэрийг эргэж тодруулж мэдэгдье. Одоо манай нисдэг тэрэгнүүд түймрийн голомтод үүрэг гүйцэтгээд ажиллаж байна.

Онцгой байдлын байгууллагын үйл ажиллагаанд ашиглагдаж буй нисдэг тэрэг нь эрэн хайх, аврах, түргэний нислэг зэрэг бүх талаар дэмжлэг үзүүлэх зорилготой. 

Яг одоо нэг нисдэг тэрэг Сэлэнгэ аймагт гарсан түймрийн голомтод агаараас тандан судлах чиглэлээр түймэр унтраах ажиллагаанд ажиллаж байгаа алба хаагчдад дэмжлэг үзүүлэн үүрэг гүйцэтгэж байна. 

Та бүхэн нэг зүйлийг ойлгоорой. Өчигдөр 17:00 цагт түймэр гарах үед Улаанбаатар хотод ямархуу хэмжээний салхи, шуургатай байсан.

Нэгдүгээрт нислэгийн аюулгүй байдлын асуудал яригдана. Нислэгийн аюулгүй байдал, нислэгийн дүрэмтэй холбоотой асуудал учраас холбогдох мэргэжлийн байгууллагын зөвлөмж сэрэмжлүүлгийн дагуу ажиллаж байгаа.

Сэтгүүлч: Онцгой Байдлын Ерөнхий Газарт гурван нисдэг тэрэг байдаг, тийм үү. Нисдэг тэргээр орон нутаг руу зорчиход хэр их зардал гардаг юм бол?

Хурандаа Т.Баярхүү: Түймрийн эрсдэл гэнэт гарч байна. Нисдэг тэргийг тодорхой ашиглах тохиолдлууд бий. Түймэр болгон дээр нисдэг тэрэг ашиглаж байгаа тохиолдол байхгүй.

Жишээ нь өчигдрийн тохиолдол гэхэд ийм хүчтэй салхи шуургатай үед нисдэг тэрэг нисэх боломжгүй байсан.

Зардлын тухайд холбогдох төсөв санхүүгийнхээ хүрээнд нисдэг тэрэгтэй холбоотой зардлууд нь шийдэгдээд явдаг.