Хятадын Huawei компани АНУ-ын Nvidia компанийн бүтээгдэхүүнтэй өрсөлдөхүйц хиймэл оюуны чип зохион бүтээжээ

Хятадын Huawei Technologies компани хиймэл оюуны шинэ хүчирхэг процессор зохион бүтээснээ туршихаар бэлдэж байгааг “The Wall Street Journal” сонин Ням гарагт мэдээлжээ.

Huawei энэ чипээрээ АНУ-ын Nvidia компанийн зарим бүтээгдэхүүнийг орлуулах зорилготой байгаа юм байна.

Тус компани саяхан Ascend 910D гэж нэрлэгдэж буй шинэ чипээ туршуулахаар Хятадын технологийн зарим компаниудад хандсаныг эх сурвалж уг төсөлд ойр ажилладаг хүмүүсээс олж мэдээлжээ.

Хиймэл оюуны технологийн тэргүүлэгч Nvidia компани Хятадын зах зээлд тусгайлан зориулсан H100 чипийг үйлдвэрлэн нийлүүлдэг байсан ч Трампын засаг захиргаа үүнд экспортын хориг тавьсан юм.

Huawei компанийн Ascend AI процессорын сүүлчийн хувилбар нь H100 чипээс илүү хүчтэй болсон гэх мэдээлэл тараад байна.

Өмнө нь уг процессорын 910B, 910C хувилбарууд зах зээлд гарч байжээ.

Шинэ процессорын эхний багц тавдугаар сарын сүүлээр үйлдвэрлэгдэж гарахаар болсон байна.

Huawei компани сүүлийн зургаан жилийн турш АНУ-ын худалдааны хоригт байгаа ч өөрийн технологийг тасралтгүй хөгжүүлсээр байгаа.

Тухайлбал 2023 онд тус компани өөрийн үйлдвэрийн процессор бүхий Mate 60 ухаалаг гар утсаа зах зээлд танилцуулж байв.

Уг бүтээгдэхүүнийг тухайн үед АНУ-ын худалдааны сайд байсан Жина Раймондо тэргүүтэй төлөөлөгчдийг Бээжинд айлчлахтай зэрэгцэн зах зээлд танилцуулсан нь нэлээд дуулиан тарьж байсан юм.

Эх сурвалж: Reuters