Москвагийн ойролцоо автомашинд тавьсан бөмбөг дэлбэрсний улмаас Оросын армийн өндөр албан тушаалтан алагджээ

Өчигдөр буюу Баасан гарагт Москва хотын зүүн талд оршдог Балашиха дагуул хотын гудамжинд автомашин дэлбэрсний улмаас Оросын армийн өндөр албан тушаалтан алагдсан тухай тус улсын мөрдөн байцаах газар мэдээлжээ.

Хохирогч нь ОХУ-ын зэвсэгт хүчний жанжин штабын үйл ажиллагааны ерөнхий газрын дэд дарга Ярослав Москалик байсныг бас мэдээлсэн байна.

“Одоо байгаа мэдээллээр бол эвдэх элементээр дүүргэсэн гар хийцийн бөмбөг дэлбэрсэн байна” гэж ОХУ-ын Мөрдөн Байцаах Хороо мэдэгдээд болсон үйл явдалд эрүүгийн хэрэг үүсгэн шалгаж эхэлснийг дуулгажээ.

Гэхдээ халдлагын ард хэн байж болох талаар огт дурдаагүй байна.

Украины дайн эхэлсэн цагаас хойш Оросын армийн хэд хэдэн өндөр албан тушаалтны аминд халдсан хэрэг гарч байв.

Оросын зарим хэвлэлүүдийн мэдээлснээр тухайн хотод оршин суудаг офицерыг зогсож байсан автомашины дэргэдүүр алхаж явах үед хэн нэгэн алсаас бөмбөгийг идэвхжүүлсэн гэнэ.

Дэлбэрэлтийн үеэр бас нэг хүн алагдсаныг Коммерсанть сонин мэдээлжээ.

Хошууч генерал цолтой Москалик өмнө нь Оросын засгийн газрын хэд хэдэн дээд түвшний төлөөлөгчдийн бүрэлдэхүүнд багтаж, олон улсын арга хэмжээнүүдэд оролцож байсан юм.

 

Ярослав Москалик

Тухайлбал тэр 2015 оны аравдугаар сард Украины дорнод нутагт 2014 онд дэгдсэн салан тусгаарлах дайны асуудлаар Минск хотод зохион байгуулагдсан Нормандын Форматын уулзалтад оролцож байжээ.

Герман, Франц, Орос, Украины төлөөлөгчид оролцсон уг уулзалтад тэр ОХУ-ын гадаад хэргийн сайд Сергей Лавров, Кремлийн туслах Юрий Ушаков нарын хамт зэвсэгт хүчний жанжин штабыг төлөөлөн оролцсон байна.

Өнгөрсөн оны арванхоёрдугаар сард Украины тусгай алба Оросын химийн зэвсгийн гол хүн гэгддэг дэслэгч генерал Игорь Кирилловын амийг цахилгаан скүүтерт нуусан бөмбөгөөр хөнөөж байв.

Москаликийн аллагын талаар Украины тал одоогоор ямар нэг байр суурь илэрхийлээгүй байна.

Эх сурвалж: Reuters