Цахим орчны нөлөөллөөс үүдэн хүмүүс гадаад төрхдөө сэтгэл хангалуун бус байх үзэгдэл дэлхий нийтээр нэмэгдэж байна. 

Үүний зэрэгцээ Ази соёлын нөлөөгөөр эмэгтэйчүүд туранхай, цайвар цагаан арьстай байх зэргээр гоо сайхны тогтсон стандарт дэлгэрч байгаа. Энэ бүх стандарт нь өөрийгөө бусадтай харьцуулж, биеийнхээ өө сэвтэй хэсгүүдийг хэт анхаарах сэтгэл ханамжгүй байдлыг улам нэмэгдүүлсээр. 

Тухайлбал биеийнхээ сэтгэл ханамжгүй аль нэгэн хэсгийг илүүтэй анхаарч, бусдын тэр хэсэг рүү харж өөртэйгөө жишдэг.

Энэхүү судалгаанд 18-25 насныхныг хамруулсан бөгөөд оюутнуудын талаас илүү хувь нь гадаад төрхдөө сэтгэл ханамжгүй байна гэсэн үр дүн гарсан.

Судалгааг гүйцэтгэхдээ 

1. асуулгын арга
2. компьютер таск
3. Eye tracking (Нүдний хөдөлгөөн хэмжигч) ашигласан. 

Гадаад төрхийн сэтгэл ханамжийн судалгааг дараах аргаар авч үзсэн. 

• Биеийн хэлбэртээ сэтгэл ханамжтай байна уу гэдгийг нь үнэлдэг.
• Биеийн хэсгүүддээ буюу нүүр, цээж, хэвлий, үс, өндөр, жин болон биеийн жингээ үнэлэх зөрүүтэй байдлыг авч үзсэн. Өөрийн жинг зөрүүтэй үнэлж байна уу гэдгийг илүү судаллаа. 

Судалгаанд оролцогчдын талаас илүү хувь нь биеийн хэлбэртээ сэтгэл ханамжтай байсан. Харин эсрэгээрээ биеийн хэсгүүддээ буюу өөрийнхөө нүүр царай, хэвлий гэхчлэн нарийн хэсгүүдэд талаас илүү хувь нь сэтгэл ханамж багатай байсан.

Чухам ямар ялгаа илэрснийг нь шинжилж үзэхэд: 

Эрчүүдийг эмэгтэйчүүдтэй харьцуулахад гадаад төрхдөө илүү сэтгэл ханамжтай байсан. Харин эмэгтэй оюутнууд сэтгэл ханамж багатай. 

Мөн эмэгтэйчүүд өөрийнхөө жинг хэтрүүлэн үнэлэх хандлагатай байсан. Спортоор хичээллэдэг оюутнуудыг спортоор хичээллэдэггүй оюутнуудтай харьцуулахад сэтгэл ханамж өндөр гарсан.

Цаашлаад хамаарлын шинжилгээг авч үзэхэд биеийн жингийн индекс нэмэгдэх тусам гадаад төрхийн сэтгэл ханамж буурч байлаа. 

Гадаад төрхийн сэтгэл ханамж буурах тусмаа тухайн биеийн хэсэгтэй хамааралтай сөрөг мэдээлэл рүү анхаарах нь их байсан.

Нүдний хөдөлгөөний үр дүнгээс авч үзвэл:

Булчиндаа сэтгэл ханамжтай байх тусам цээж рүү их анхаарч байлаа. Харин эсрэгээрээ хэвлий рүү харахаас зайлсхийж байгаа гэсэн үр дүн гарсан.

Мөн биеийн дээд хэсэг буюу цээж хэсэгтээ сэтгэл ханамжтай байх тусмаа биеийн хэвлий хэсэг рүү анхаарах нь бага. 

Гадаад төрхийн сэтгэл ханамж нь анхаарлын хазайлтад нөлөөлж байгаа эсэхийг шинжилж үзэхэд хамаарлын үр дүнтэй. 

Эрэгтэйчүүд гадаад төрхдөө илүү сэтгэл хангалуун, жин нэмэх хүсэлтэй байсан бол эмэгтэйчүүд гадаад төрхдөө сэтгэл ханамж бага, жингээ хасахыг хүсдэг байна.

Эрэгтэйчүүд өөрсдийнхөө жинг бодитоор үнэлдэг. Харин эмэгтэйчүүд жингээ хэтрүүлэн үнэлэх хандлагатай байдаг буюу гадаад төрхийн сэтгэл ханамж нь хүйсийн ялгаанаас ихээхэн шалтгаалж байна гэсэн үр дүн гарч ирсэн.

Мөн биеийн жин нэмэгдэх тусам гадаад төрхийн сэтгэл ханамж буурч байсан.

Гадаад төрхийн сэтгэл ханамж муу байвал тухайн биеийнхээ хэсэгтэй холбоотой сөрөг үгсэд эмзэг буюу анхаарал хандуулах нь нэмэгдэж байсан. Өөрөөр хэлбэл тухайн хэсэгтэй холбоотой хэт мэдрэг байдлыг өдөөж байж магадгүй. 

Сэтгүүлч: Үгэнд анхаарал хандуулах гэдгийг тайлбарлахгүй юу?

Сэтгэл зүйч: Судалгааны үр дүнгээс харвал гадаад төрхтэй холбоотой сөрөг үгсэд илүү цочирдсон байдлаар анхаарч байсан. Нүдний хөдөлгөөн хэмжигч аппаратын судалгаанаас харахад эхний хэдэн секундийн хувьд биеийнхээ сэтгэл ханамжгүй хэсэг рүүгээ маш хурдан анхаарлаа төвлөрүүлдэг.

Бусдын тэр хэсэг рүү хараад өөртэйгөө харьцуулдаг. Ингэж өөртэйгөө жишиж харьцуулснаар сэтгэл ханамжгүй байдал нэмэгддэг.